د لوړو زده کړو وزارت او ملي پراختیا شرکت تر منځ د دوه اړخیزو همکاریو هوکړه لاسلیک شوه.
د دغې هوکړې موخه په سترو ملي پروژو کې د استادانو له ظرفیتونو ګټه اخیستنه، محصلینو ته د ملي پراختیا شرکت په پروژو کې د عملي کارونو زمینه برابرول او د پایلیکونو پروژو تکمیلول، د لوړو زده کړو وزارت له لوري د ملي پراختیا شرکت کارکوونکو ته د ماسټري او دوکتورا برنامو زمینه برابرول، علمي څېړنیزو کنفرانسونو ته د ملي پراختیا شرکت کارکوونکو رادعوتول، دواړه لوري یو د بل له کادرونو، متخصصینو او امکاناتو څخه ګټه اخیسته او دې ورته نور موارد شامل دي.
د یادې شوې هوکړې په مراسمو کې چې د لوړو زده کړو وزارت مشرتابه پلاوي، مرکزي ادارو رئیسانو، د امارتي تحصیلي بنسټونو مشرتابه پلاوو هم حضور لره، د لوړو زده کړو سرپرست وزیر شیخ الحدیث مولوي نداء محمد ندیم وویل چې موږ د دغې هوکړې پر بنسټ نظر او عمل سره یو ځای کوو او په ګډه د افغانستان د پرمختک لپاره کار کوو.
نوموړي زیاته کړه چې زموږ د دنیا او اخرت پرمختګ او بریا له یو بل سره په مرسته او همکارۍ کې ده او دا د بشریت اړتیا ده.
دغه راز د ملي پراختیا شرکت رئیس عبدالرحمن عطاش او تخنیکي ټیم يې د دغه شرکت د پروژو په اړه معلومات وړاندې کړل او له لوړو زده کړو وزارت سره یې د ګډو همکاریو هوکړه مهمه وبلله.
وروسته د ناستې ګډونوالو د یاد شرکت له نوې جوړې شوې ودانۍ، دفترونو، فابریکې او مرکزي لابراتوار څخه لیدنه وکړه.
د یادونې وړ ده چې د لوړو زده کړو وزارت او ملي پراختیا شرکت تر منځ د دوه اړخیزو همکاریو هوکړه د لوړو زده کړو وزارت علمي معین دوکتور لطف الله خیرخواه او د ملي پراختیا شرکت مالي او اداري مرستیال عبدالولي عادل تر منځ لاسلیک شوه.
نېټه: یکشنبه
۱۴۴۶هـ.ق، د محرم الحرام ۸مه
۱۴۰۳هـ.ش، د سرطان ۲۴مه
