د لوړو زده کړو سرپرست وزیر او ورسره مل پلاوي لوګر ولایت ته د رسمي سفر په ترڅ کې له لوګر لوړو زده کړو مؤسسې څخه لیدنه وکړه
د لوړو زده کړو سرپرست وزیر محترم شیخ الحدیث مولوي نداء محمد ندیم د یادې مؤسسې څخه د لیدنې تر څنګ، په هغه غونډه کې چې د لوګر ولایت والي، د لوګر لوړو زده کړو مؤسسې رهبري پلاوي، د لوګر ملکي او نظامي ادارو مسؤلینو، دیني علماء کرامو، د یادې مؤسسې استادانو، اداري کارکوونکو او محصلانو ګډون درلود، د دیني او عصري زده کړو پر ارزښت خبرې وکړې.
لوړو زده کړو سرپرست وزیر زیاته کړه: « په عصري زده کړو سره په هېواد کې روغتیایي، اقتصادي او نور تحصیلي پرمختګونه منځ ته راځي او هېواد به له خپلو شته مادي او طبیعي امکاناتو څخه د ښې هوساینې څښتن شي.»
نوموړي همدا راز ځوانان د نن ورځې محصلان او د سبا ورځې امیران، وزیران، معینان، والیان، رئیسان او نور لوړ رتبه مسؤلین یاد کړل او پر استادانو یې غږ وکړ، چې د خپلو محصلانو علمي، مسلکي فکري او عقیدوي روزنې ته پوره پام وکړي.
وروسته د لوګر والي شیخ ضیاءالرحمن مدني هم په خپله وینا کې د عصري او دیني علومو پر زده کړې او سالم فکر جوړونې ټینګار وکړ او پر محصلانو یې غږ وکړ، چې د تېرې جمهوري ادارې له کړنو او ناخوالو دې سالمې تجربې واخلي.
همدارنګه د لوګر لوړو زده کړو مؤسسې رئیس مولوي ضیاءالاحمد صارم د لوړو زده کړو وزارت له رهبري څخه په مننې د دغې مؤسسې دری کلنې لاسته راوړنې، پرمختګونه، نوښتونه او شته ستونزې او غوښتنې د لوړو زده کړو له سرپرست وزیر سره شریکې کړې.
د یادونې وړ ده چې د لوړو زده کړو وزارت سرپرست وزیر محترم شیخ الحدیث مولوي نداء محمد ندیم د هېواد یو شمېر ولایتونو ته د خپلو رسمي سفرونو په ترڅ کې د تحصیلي بنسټونو او دیني جامعاتو او تخصصاتو، مسؤلینو،استادانو، فاضلانو، محصلانو او د غونډو ټولو ګډونوالو ته د وینا پر مهال د امر با المعروف او نهي عن المنکر وزارت د نوي قانون او د امیر المؤمنین حفظه الله د فرمانونو د تطبیق او عملي کېدو په اړه اړینې سپارښتنې او توصیې وکړې.
نوموړي په ټولو ناستو کې استادانو او محصلانو ته د یاد قانون د پابندۍ په اړه ټینګار وکړ او زیاته یې کړه: چې مونږ او تاسو ټول باید د شرعیت په تطبیق او عملي کېدو کې له اولینو او سابقینو څخه واوسو، ځکه چې دا یو شرعي او اسلامي قانون دی.
۱۴۴۶ هـ.ق د ربیع الثاني ۲۰ مه
۱۴۰۳ هـ.ش د عقرب ۲
۲۰۲۴م د اکتوبر ۲۲ مه
