په افغانستان کې روغتیایي سیستم او خدمتونو ته کتنه، فرصتونه، ستونزې او حلارې، دوه ورځني ملي کنفرانس لومړۍ ورځ پای ته ورسېده
د لوړو زده کړو وزارت په همکارۍ، سپین غر لوړو زده کړو خصوصي موسسې (ننګرهار) لخوا «په افغانستان کې روغتیایي سیستم او خدمتونو ته کتنه، فرصتونه، ستونزې او حلارې» تر نامه لاندې دوه ورځنی ملي کنفرانس د لوړو زده کړو وزارت او عامې روغتیا وزارت مسوولینو، د سیمه ییزو ادارو استازو، د امارتي او خصوصي تحصیلي نهادونو یو شمېر مسوولینو، څېړونکو او استادانو په ګډون سره پیل شو، چې ۷۹ څېړنیزې مقالې به پکې وړاندې شي.
د دغه کنفرانس د پیل په مراسمو کې د لوړو زده کړو وزارت مالي او اداري معین الحاج مولوي حافظ محمد حامد حسیب وویل، چې افغانستان په تحصیلي برخه کې، په امارتي او خصوصي دواړو سکټورونو کې فعالیت کوي. د هغه په وینا؛ موږ د دواړو معیار او ملاتړ ته ژمن یو.
د لوړو زده کړو وزارت مالي او اداري معین له ډاکټرانو او د طبي برخو له استادانو وغوښتل چې د هېواد د روغتیایي برخې اصلي ستونزې (د باکیفیته او معیاري درملو نه شتون) ته حلارې وړاندې کړي.
همدارنګه د عامې روغتیا وزارت د روغتیایي پراختیا او پالیسۍ معین دوکتور محمد حسن غیاثي، د ننګرهار مرستیال والي، د علماوو شورا رییس، د افغانستان بانک د څارنې او بانکي خدمتونو لوی امر او د ننګرهار پوهنتون رییس، نور هغه ویناوال وو، چې د کنفرانس ګډونوالو، ډاکټرانو او له استادانو څخه یې د روغتیايي برخې پرمختیا او پراختیا په اړه د شته فرصتونو په رڼا کې، د هر اړخیزو هڅو غوښتنې وکړې.
دغه کنفرانس ته د هېواد د بېلا بېلو امارتي او خصوصي تحصیلي نهادونو د استادانو او څېړونکو له لوري ۷۹ څېړنیزې مقالې راغلي، چې ۶۰ مقالې به یې ارایه او ۱۹ به د پوسټر پرېزنټېشن له لارې وړاندې شي.
د یادونې وړ ده چې تر دې مخکې هم د لوړو زده کړو وزارت اړوند امارتي او خصوصي تحصیلي نهادونو له لوري په مختلفو مهمو موضوعاتو ملي او نړیوال کنفرانسونه دایر شوي او په طبي برخه کې دا لومړی کنفرانس دی.
نېټه: چهارشنبه
۱۴۴۶هـ.ق، د ذوالقعدې ۹مه
۱۴۰۴هـ.ش، د ثور ۱۷مه
۲۰۲۵م، د مې ۷مه
