د لوړو زده کړو وزارت سرپرست وزیر په کندهار پوهنتون کې د مسؤلینو، استادانو او محصلینو یوې سترې غونډې ته وینا وکړه
د لوړو زده کړو سرپرست وزیر محترم شیخ الحدیث مولوي نداء محمد ندیم، کندهار ولایت ته د خپل کاري سفر پرمهال، په کندهار پوهنتون کې د مسؤلینو، استادانو او محصلینو یوې سترې غونډې ته په داسې حال کې وینا وکړه، چې د کندهار د پوهنې رئیس، د علماوو شورا مرستیال، د ابراهیم النخعي رحمه الله جامعې رئیس او نورو علماء کرامو او مشرانو هم حضور درلود.
غونډې ته د وینا پرمهال د لوړو زده کړو سرپرست وزیر د اسلامي نظام اهمیت او ارزښت، انساني کرامت او مسؤلیتونه یې او د علم پر فضیلت خبرې وکړې، هغه اسلامي نظام د انساني کرامت ساتونکی یاد کړ او ویې ویل: «انساني کرامت د الله تعالی په عبادت او بندګۍ کې خوندي دی؛ خو کله چې انسان د الله تعالی نافرماني وکړي، نو په اسلام او اسلامي ټولنه کې خپل کرامت له لاسه ورکوي.»
نوموړي زیاته کړه، د اسلامي نظام قانون د الله تعالی کتاب وي او انسان دنیوي او اخروي کامیابۍ ته رابولي. د لوړو زده کړو سرپرست وزیر همدارنګه وویل، چې هر مسلمان باید په خپل مسلک کې عصري علوم ترلاسه او د دیني علومو ارزښت وساتي او له استادانو او مسؤلینو یې وغوښتل چې د هېواد د بچیانو سالمې روزنې په برخه کې خپلې هڅې لا زیاتې کړي.
همداراز د کندهار پوهنتون رئیس او د کندهار ولایت د علماوو شورا مرستیال د دیني او عصري علومو پر اړتیا خبرې وکړې او له استادانو یې وغوښتل، چې په واک کې ورکړل شويو ځوانانو سره د ښې روزنې په برخه کې هڅې وکړي.
نېټه: شنبه
۱۴۴۶ هـ.ق د رمضان المبارک ۱۵ مه
۱۴۰۳ هـ.ش د کب ۲۵ مه
۲۰۲۵ م د مارچ ۱۵ مه
