د هېواد ۱۴ ولایتونو امارتي او خصوصي تحصیلي نهادونو څارنه او ارزونه ترسره شوه.
د لوړو زده کړو وزارت د علمي چارو څارنې او ارزونې ریاست ټاکل شوي پلاوي له لوري د کندهار، هلمند، نیمروز، فراه، روزګان، زابل، غزني، میدان وردګ، غور، دایکندي، بامیان، ننګرهار، نورستان او کونړ ولایتونو امارتي او خصوصي تحصیلي نهادونو د علمي، اداري او تدریسي چارو هر اړخیزه څارنه او ارزونه ترسره شوه.
په یاده څارنه او ارزونه کې اداري، د محصلانو او استادانو چارې، په ټولګیو کې په عملي توګه د محصلانو د حاضریو کنترول او همدا راز درسي امکانات له نږدې وکتل شول.
د لوړو زده کړو وزارت د علمي چارو څارنې او ارزونې رییس مولوي احمدالله حماد په وینا؛ د دغو ارزونو پایلې ښیي چې د پوهنتونونو چارې د پخوا په پرتله تر ډېره معیاري او د اصولو خواته تللي دي او ډېرې ستونزې یې حل شوې دي.
د یادونې وړ ده چې دغه څارنه او ارزونه په تېره میاشت کې ترسره شوې او اوسمهال دا لړۍ په مرکز کې دوام لري.
