د لوړو زده کړو وزیر محترم شیخ الحدیث مولوي نداء محمد ندیم په خپل کاري دفتر کې د جاپان له سفیر تاکویوشي کورومایا سره لیدنه او خبرې وکړې.
په دغه لیدنه کې د لوړو زده کړو وزیر په افغانستان کې د جاپان سفیر د بریالي ماموریت یادونه وکړه او د افغانستان پر وړاندې یې د جاپان د مثبتو سیاستونو څخه خپله خوښي څرګنده کړه.
محترم شيخ صاحب زیاته کړه، چې جاپان د اسلامي امارت او د افغانستان خلکو دیني او فرهنګي ارزښتونو ته پر درناوي او مثبت چلند سره خپلې اړیکې په ښه توګه ساتلې دي او موږ له ټولو نږدې او لرې هېوادونو سره د داسې ښو اړیکو غوښتونکي یو، چې پر متقابل درناوي ولاړې وي.
د لوړو زده کړو وزیر د تاریخ په اوږدو کې او په ځانګړي ډول په وروستیو څلورو کلونو کې د جاپان له مرستو او همکاریو څخه مننه وکړه او د دغو همکاریو پر پیاوړتیا او دوام یې ټینګار وکړ.
وروسته د جاپان سفیر تاکویوشي کورومایا، د هېواد په ختیځ کې د وروستۍ زلزلې په تړاو د خواخوږۍ مراتبو وړاندې کولو تر څنګ، زیانمنو شویو خلکو لپاره د مرستې چمتووالی اعلان کړ.
د جاپان سفير په دغه لیدنه کې د خپل ماموریت پای ته رسېدو ته په اشارې سره وویل، چې افغانستان او جاپان اوږد مهالې اړیکې لري او موږ به دا ښې اړیکې لا پسې وغځوو.
د جاپان سفیر په افغانستان کې د خپل ماموریت څخه خوښي څرګنده کړه، چې دغه ماموریت به یې نوی سفیر په غاړه واخلي او زیاته یې کړه، چې افغانستان د ښه پرمختګ پر لور روان دی.
نېټه: دوشنبه
۱۴۴۷هـ.ق د ربیع الاول ۸ مه
۱۴۰۴هـ.ش د سنبلې ۱۰مه
۲۰۲۵م د سپټمبر لومړۍ
