لوړو زده کړو وزیر د تخنیکي او مسلکي زده کړو د ادارې له مشرې سره وکتل
د لوړو زده کړو وزیر ډاکتر عباس بصیر په خپل کاري دفتر کې د افغانستان د مسلکي او تخنیکي زده کړو ادارې له ريیسې سره وکتل او د عالي انستیتیوت د جوړولو د پروسې په اړه يې خبرې وکړې.
په دې کتنه کې ډاکتر بصیر وویل، د لوړو زده کړو وزارت د تحصیلي بنسټونو د جوړېدو په برخه کې چې د ادارو یا اشخاصو له خوا جوړېږي او قانوني پړاوونه يې وهلي وي همکار دی او ملاتړ يې کوي.
نوموړي زياته کړه، د لوړو زده کړو وزارت د قانون له لسمې مادې سره سم د ادارو له خوا د جوړېدونکو اکاډمیکو بنسټونو ملاتړ کوي او تر خپل وس پورې ورسره مرسته کوي.
همداراز په دې کتنه کې د تخنیکي او مسلکي زده کړو مشرې ندیمې سحر د لوړو زده کړو له وزارت د مننې په ترڅ کې د خپلو ترسره شوو کړنو په اړه وویل چې اداره يې د لوړو زده کړو له تقنیني سندونو سره سم د تخنیکي زده کړو د عالي انستیتیوت د جوړولو په برخه کې قانون ته ژمنه ده، په کتنه کې له هر اړخیزو خبرو وروسته پرېکړه وشوه چې په دې اړه دې نصاب د لوړو زده کړو وزارت په اختیار کې ورکړل شي چې په اړه يې لازم تصمیمونه ونیول شي.
