د کابل او لغمان پوهنتونونو تر منځ د همکاریو هوکړه لیک لاسلیک شو
دغه هوکړه لیک د لوړو زده کړو وزارت د ستراتیژیک پلان له مخې د علمي او اکاډمیکو معلوماتو د وړاندې کولو، د علمي کیفیت د ښه والي او تحصیلي کیفیت د لوړوالي په موخه د دواړو پوهنتونونو ترمنځ لاسلیک شو چې پر بنسټ به يې د دواړو پوهنتونونو ګډې څېړنیزې پروژې، سيمینارونه او علمي غونډې، تعليمي ورکشاپونه، د یو بل له اسنادو او خدمتونو متقابله استفاده کول او ټولې همکارۍ ترسره کېږي.
د کابل پوهنتون ريیس پوهاند ډاکټر محمد عثمان بابري د دې هوکړه لیک لاسلیک ارزښتناک وباله او د دواړو پوهنتونونو ترمنځ همکارۍ يې د لوړو زده کړو د ځواکمنتیا له پاره اغېزمنې وبللې، د دې هوکړه لیک پر عملي کېدو یې ټينګار وکړ او ژمنه يې وکړه چې د کابل پوهنتون له لوري له لغمان پوهنتون سره د هر راز همکاریو له پاره چمتو دي.
همداراز د لغمان پوهنتون علمي مرستیال پوهنیار میرویس صدیقمل د کابل پوهنتون د پلاوي له همکارۍ او چمتووالي مننه وکړه، ویې ویل کابل پوهنتون د هېواد د ستر تحصیلي بنسټ په توګه په اکاډمیکو چارو کې د تجربو او امکاناتو له پلوه یو بډای پوهنتون دی او د دواړو پوهنتونونو ترمنځ د لاسلیک شوي هوکړه لیک د موادو پلي کول د لغمان پوهنتون په پرمختګ او ظرفیت لوړونه مثبت اغېز کولای شي.
