د هېواد پوهنتونونو د بېلابېلو څانګو ټولنیزو علومو پوهنځی، ارواپوهنه او روزنیزو علومو د تحصیلي نصاب د پراختیا او بیاکتنې لومړی پړاو ملي پروګرام پیل شو
د هېواد پوهنتونونو د بېلابېلو څانګو ټولنیزو علومو پوهنځی، ارواپوهنه او روزنیزو علومو د تحصیلي نصاب د پراختیا او بیاکتنې لومړی پړاو ملي پروګرام، نن روغتیایي سپارښتنو ته په کتو په لوړو زده کړو وزارت کې پیل شو.
د پروګرام په پیل کې د لوړو زده کړو وزیر دوکتور عباس بصیر د نصابونو نوي کول او بیاکتنه د دغه وزارت له اړینو پروګرامونو وبلل او ویې ویل، چې تر دې مهاله ۷۱ تحصیلي نصابونه بیاکتل شوي او په پام کې ده، چې د کال په بهیر کې به د نورو څانګو ۹۰ نصابونه هم د استادانو او د نصاب بیاکتنې ملي کمېسیون د غړو له لوري وکتل شي.
هغه د تحصیلي نصاب پر ازرښت د ټینګار او پر زده کړه یې د اغېزو په اړه وویل:"له شک پرته چې تحصیلي نصابونه په کال کې یو ځل کتل کېږي او له ورځنیو اړتیاوو سره سمېږي او که چېرې تحصیلي نصاب او زده کړې د ټولنې او زدکړیال اړتیاوې پوره نه شي کړای، نو د ټولنې او زده کړو تر منځ به واټن رامنځته شي.
د لوړو زه کړو وزیر په ټولنه کې پوهې پرمختګ ته په اشارې سره وویل چې پرمختګ او په پوهه کې چټکو بدلونونو ته په کتو، جدي اړتیا احساسېږي چې خپل تحصیلي نصاب د کار بازار او ټولنې ته په کتو عیار کړو.
دغه راز هغه د پروګرام له جوړونکو د مننې تر څنګ له استادانو او د نصاب د کمېسیون له غړو وغوښتل چې په پوره پام سره د نصاب په توکو کار وکړي.
وروسته د لوړو زده کړو وزارت علمي پروګرامونو د پراختیا رییس پوهندوی علي جان عادل د هېواد پوهنتونونو د ټولنیزو علومو پوهنځی، ارواپوهنې او روزنیزو علومو پوهنځی د نصاب بیاکتنې د پروسې په اړه معلومات ورکړل او ویې ویل چې په دې پروسه کې به نږدې د ۱۵ پوهنځيو نصاب وکتل شي او په نورو پړاوونو کې د نصاب مسوده دولتي او خصوصي تحصیلي بنسټونو ته د نظر غوښتنې په پار وړاندې کېږي.
همدارنګه د نصاب ملي کمېسیون غړي پوهندوی داود شاه فاروق، د کار بڼې او پر درسي مفرداتو د کار څرنګوالي په اړه په پرېزنټېشن کې معلومات وړاندې کړل.
په پام کې ده چې د یادو پوهنځيو د بیاکتنې لړۍ تر پنجشنبې پورې دوام وکړي، چې د نصاب بېلابېلو برخو په اړه د ښکېلو ادارو کارپوهانو په همکارۍ او له ملي او نړیوالو معیارونو سره سم به کار تر سره شي.
