د شېخ زاید پوهنتون د خان عبدالصمد خان اڅکزي د غونډو په تالار کې د ژبو او ادبیاتو پوهنځي ادبي څپ غونډه جوړه شوه
د ادبي څپ کالنۍ غونډه چې مشر مېلمه یې د سیمې په کچه وتلی او منلی شاعر پیر محمد کاروان و، د ژبو او ادبیاتو پوهنځي استاد پوهنمل ظاهر شاه زهیر په پرانېستې وینا پیل شوه.
یاده ادبي غونډه په دوو برخو وېشل شوې وه، لومړۍ برخه یې د پښتو څانګې څلورم ټولګي محصل انارګل فرهادي پر شعري ټولګه (چې درنه تاو کړمه دا غبرګ لاسونه) مخکتنه وشوه، په لومړي سر کې شاعر پیر محمد کاروان د کتاب پر منځپانګې، ادبي او هنري برخو هر اړخیزې ویناوې وکړې.
ورپسې د ژبو او ادبیاتو پوهنځي استادانو او محصلانو پر یادې شعري ټولګې خپل نظرونه ورکړل، د کتاب مثبتې او منفي خواوې یې ګډونوالو ته په ګوته کړې.
د ادبي څپ غونډې دویمه برخه کې ازاده مشاعره وشوه چې د مېلمنو شاعرانو ترڅنګ د شېخ زاید پوهنتون او په ځانګړې توګه د ژبو او ادبیاتو پوهنځي شاعرو محصلانو خپل شعرونه واورول.
د یادونې وړ ده چې د شېخ زاید پوهنتون د ژبو او ادبیاتو پوهنځي استادان او محصلان هر کال د پوهنتون ادبي څپ کالنۍ غونډه رابولي چې د سیمي په کچه لیکوالان او شاعران پکې ګډون کوي.
