د مرکز پوهنتونونو په لیلیو کې د خدمتونو وړاندې کولو د نظم د تأمین په پار ناسته وشوه
د لوړو زده کړو وزارت د مالي او اداري چارو معین نور احمد دروېش په مشرۍ د کابل پوهنتون او د کابل پولي تخنیک پوهنتون په لیلیو کې د خدمتونو د وړاندې کولو د پروسې د نظم برابرولو په اړه غونډه وشوه.
په دې غونډه کې د کابل پوهنتون رییس پوهاند محمد عثمان بابري، د کابل پولي تخنیک پوهنتون رییس پوهنوال عبدالرشید اقبال او د لوړو زده کړو وزارت د مرکزي ادارو یو شمېر رییسانو او مدیرانو برخه اخیستې وه.
د لوړو زده کړو وزارت د مالي او اداري چارو معین نوراحمد دروېش د یادو پوهنتونونو د لیلیو د خدمتونو د څرنګوالي په اړه د بحث ترڅنګ، په لیلیو کې نظم او اسانتیاوي رامنځته کول له هغو اړتیاوو څخه وبللې چې باید په اړه یې یوه کره د حل لاره په پام کې ونیول شي.
د لوړو زده کړو وزارت د مالي او ادارې چارو معین وویل چې د لیلیو مسؤلین باید د خواړو تنظیم، زدکړیالانو لپاره د پخلي او ډوډۍ وېشلو له پروسې څخه څارنه او همکاري، د پخلنځیو او لیلیو چاپېریال د پاکولو کنټرولو او د روغتیایي شرایطو او پاکوالي په برخه کې د زدکړیالانو همکارۍ په جلبولو سره په جدي توګه نظم پلی کړي او د خواړو او زدکړیالانو د وخت ضایع کول مخنیوی وشي.
په دې غونډه کې د هغې چلنلارې د ګټې اخیستنې په اړه بحث وشو چې وکړای شي اداري نظم برابر کړی.
همدارنګه په دې غونډه کې پرېکړه وشوه چې یاده چلنلار به په راتلونکې ناسته کې د لازمو اسنتیاوو او غوره خدمتونو د رامنځته کولو لپاره د یادو لیلیو د مسؤلینو په شتون کې نهایي او پلې شي.
