د لوړو زده کړو سرپرست وزیر د لغمان پوهنتون استادانو سره ناسته وکړه او په تدریسي چارو کې يې مخلصانه خدمت ته راوبلل.
یاده ناسته، چې لغمان پوهنتون د انجنیري پوهنځي د کنفرانسونو په تالار کې ترتیب شوې وه، د لوړو زده کړو سرپرست وزیر الحاج مولوي عبدالباقي حقاني، د دې وزارت د دعوت او ارشاد ريس شیخ شاکرالله وحدت او د لغمان پوهنتون استادانو پکې ګډون کړی وو.
د لوړو زده کړو سرپرست وزیر په یاده ناسته کې د هېواد په پرمختګ کې د استادانو په رول خبرې وکړې او همداراز یې وویل:(( په اسلامي هېوادونو کې دوه ډوله د زده کړو مرکزونه شتون لري یو ډول د مسلمانانو دیني ضرورتونه پوره کوي او بل ډول یې دنیاوي، په افغانستان کې د دې دواړو زده کړیزو مراکزو ترمنځ فاصله پیدا شوې وه، مونږ له اول نه په دې فکر کې وو، چې ترمنځ یې فاصلې ختمې کړو او د لوړو زده کړو په چوکاټ کې د عصري علوم ترڅنګ په دیني زده کړو سمبال کادرونه و روزو، په دې برخه کې مو کوټلي ګامونه اخیستي، په پوهنتونونو کې مو د اسلامي ثقافت مضمون پوهنتون شموله کړ او په کریډیټونونو کې مو زیاتوالی راوست)).
د ناستې په اوږدو کې د لوړو زده کړو سرپرست وزیر له هغه استادانو مننه وکړه، چې په سختو حالاتو کې د خپلو هېواد والو ترڅنګ پاتې دي او د ځوانانو سالمه روزنه کوي.
په یاده ناسته کې د لغمان پوهنتون د استادانو په نماینده ګۍ استاد عمران الله خنجر له سرپرست وزیر سره خپلې غوښتنې شریکې کړې، چې سرپرست وزیر یې د پوره کېدو ډاډ ورکړ.
