د لوړو زده کړو سرپرست وزیر شیخ الحدیث مولوي نداء محمد ندیم صاحب شمال زون ته د کاري سفر په بهیر کې د بغلان پوهنتون له مسؤلینو، استادانو او محصلینو سره ناسته وکړه.
په یاده ناسته کې د لوړو زده کړو سرپرست وزیر، په داسې حال کې چې د دغه وزارت علمي معین دوکتور لطف الله خیرخواه، د مرکزي ادارو یو شمېر رئیسانو او د بغلان والي هم حضور درلود، د بغلان پوهنتون له استادانو وغوښتل چې د اسلامي او ملي ارزښتونو په رڼا کې د محصلینو د رزونې تر څنګ، د هېواد د ځان بساینې لپاره هڅې وکړي.
دغه راز د لوړو زده کړو سرپرست وزیر د استادانو مسؤلیتونو ته په اشارې سره وویل، چې استادان د هېواد لپاره علمي او تخصصي کادرونه روزي او هغوی ته یې ډاډ ورکړ چې د ا.ا.ا خپلو امکاناتو ته په کتو د دوی د مالي امتیازاتو د زیاتوالي په هڅه کې دی.
همدارنګه د بغلان پوهنتون مسؤلینو، استادانو او محصلینو د لوړو زده کړو سرپرست وزیر له ورتګ څخه مننه وکړه او د دغه پوهنتون یو شمېر ستونزې او وړاندیزونه یې ورسره شریک کړل، چې د لوړو زده کړو سرپرست وزیر له لوري د ستونزو د حل ډاډ ورکړل شو.
نېټه: سه شنبه
۱۴۴۴/۴/۲۷هـ.ق ۱۴۰۱/۹/۱هـ.ق ۲۰۲۲/۱۱/۲۲م
د لوړو زده کړو وزارت مطبوعاتي دفتر
