د لس میلیونه او ۷۰۰ زره افغانیو په لګښت د هرات پوهنتون د طب پوهنځی تدریسي روغتون د ودانۍ او انګړ د بیا رغونې او ترمیم پروژې چارې د دغه پوهنتون مسؤلینو په شتون کې پیل شوې.
د يادې پروژې د پرانېستې په مراسمو کې د هرات پوهنتون رئيس شيخ الحديث ابوالحکمت مفتي عبدالغفار د طب پوهنځی د تدریسي روغتون د بيا رغونې او ترمیم پروژې پيل يو ښه ګام وباله او ويې ويل:« د پروژې په بشپړیدو او د روغتون په پرانیستلو سره به د هرات ولایت اوسیدونکو لپاره د طبي معیاري خدمتونو او د درملنې د لګښتونو وړاندې کولو په برخه کې د پام وړ اسانتیاوې رامنځته شي.»
همدارنګه د هرات پوهنتون د طب پوهنځی رئيس پوهاند ډاکټر شفيق احمد جويا، هرات پوهنتون کې د تدریسي روغتون د بيا رغونې د کار په پيل کېدو خوښي څرګنده کړه او ويې ويل: « له بده مرغه د هرات پوهنتون طب پوهنځی د خپل څو کلن فعاليت په بهیر کې د تدریسي روغتون د نشتون له امله د دغه پوهنځی استادان او محصلان له ګڼو ستونزو سره مخ وو، چې له نېکه مرغه د لوړو زده کړو وزارت د پاملرنې او د پوهنتون د رهبري پلاوي په هڅو به نږدې وخت کې د نوموړي روغتون د پرانېستې شاهدان یو.
د هرات پوهنتون د مسؤلينو په وينا، د دغه پوهنتون د تدریسي روغتون د ترميم او بيا رغونې چارې به نږدې وخت کې بشپړې او په رسمي ډول به پرانيستل شي.
نېټه: سه شنبه
4/7/1445هـ ق 26/10/1402هـ ش 15/1/2024م
