د فدارتیف روسیې د پوهنې او لوړو زده کړو وزیرانو په دویمه نړیواله ناسته کې د لوړو زده کړو سرپرست وزیر وینا وکړه.
د یادې ناستې موخه د غړو هېوادونو تر منځ د ګډو علمي همکاریو ایجاد، په راتلونکي کې د ګډو اکاډمیکو پروګرامونو جوړول او د یوبل له تجربو څخه ګټه اخیستل او په علمي ډګر کې د شته ستونزو پر وړاندې مبارزه ده.
په دغه ناسته کې د لوړو زده کړو سرپرست وزیر شیخ الحدیث مولوي نداء محمد ندیم، په داسې حال کې چې د پوهنې سرپرست وزیر مولوي حبیب الله آغا هم حضور درلود، د ناستې ګډونوالو ته د افغانستان د تحصیلي نظام او نورو برخو په اړه معلومات ورکړل او ویې ویل چې د ا.ا.ا د علم پرمختګ او په دې ډګر کې له سیمي او نړۍ سره سیال کېدو ته ژمن دی. نوموړي زیاته کړه: «د ا.ا.ا له حاکمیت وروسته زموږ هېواد د سیاسي، اقتصادي او نورو برخو تر څنګ په تحصیلي ډګر کې هم ډېر پرمختګونه کړي، چې د بېلګې په توګه د ۱۳۱ څانګو د نصاب بیا کتنه او ۱۴ سترو زېربنایي پروژو بشپړول یادولی شو. همدارنګه اوسمهال شاوخواه ۵ سوه زره محصلین د افغانستان په پوهنتونونو کې په زده کړو بوخت دي.»
دغه راز د لوړو زده کړو سرپرست وزیر په خپلو خبرو کې وویل: «افغانستان همېشه د نورو له یرغل سره مخ شوی او زیان یې لیدلی دی. د ا.ا.ا هېڅ وخت د چا په کورنیو مسایلو کې مداخله نه ده کړې او له نورو هم د ورته عمل توقع لري.» هغه زیاته کړه چې موږ د ټولو مخربو کړیو پر وړاندې مبارزه کړې او کوو یې.
د لوړو زده کړو سرپرست وزیر د فدارتیف روسیې د پوهنې او لوړو زده کړو وزیرانو دویمې نړیوالې ناستې له غړو هېوادونو څخه وغوښتل چې له افغانستان سره په علمي ډګر کې د ګډو همکاریو هوکړې او تړونونه لاسلیک او عملي کړي او زیاته یې کړه: «موږ به ستاسو له مهارتونو او تجربو او تاسو زموږ له مهارتونو څخه استفاده وکړئ.»
د یادونې وړ ده چې په یاده ناسته کې ۴۲ هېوادونه غړیتوب لري او هر کال د فدارتیف روسیې په تاتارستان هېواد کې جوړیږي.
