د کابل طبي علومو پوهنتون له ۶ پوهنځيو څخه ۲۲۲ تنه محصلین، د ریاست الورزاء سیاسي مرستیال په حضور کې فارغ او ټولنې ته د خدمت لپاره وړاندې شول.
د کابل طبي علومو پوهنتون کې، په همدې مناسبت فراغتغونډه کې، چې د لوړو زده کړو وزارت او کابل طبي علومو پوهنتون مشرتابه پلاوي، استادانو، فارغو شویو محصلینو او د هغوی د کورنۍ غړو ګډون کړی و، د ریاست الوزراء سیاسي مرستیال مولوي عبدالکبیر د یادو ډاکټرانو په فراغت خوښي وښوده او ترې ویې غوښتل چې د هېواد د روغتیا سکټور د اعتماد بیا تر لاسه کولو کې خپل رول ولوبوي.
نوموړي زیاته کړه: «پخوا مافیا د روغتیا سکټور اعتماد په خلکو کې له منځه وړی و، چې په پایله کې یې هر کال زموږ ډېر شمېر ناروغان بهر ته د درملنې په موخه تلل، چې له نېکه مرغه له فتحې وروسته له دې برخې څخه د مافیا لاسونه لنډ شوي دي.»
د ریاست الوزرا سیاسي مرستیال د ا.ا.ا د تېرو دریو کلونو د فعالیتونو او لاسته راوړنو په اړه معلومات ورکړل او له فارغو شویو ډاکټرانو څخه یې وغوښتل، چې د اسلام مبین دین پر اوصولو خپل ظاهر او باطن برابر او د خپلو خلکو اقتصادي حالت ته په کتو د هغوی خدمت وکړي.
وروسته د لوړو زده کړو سرپرست وزیر شیخ الحدیث مولوي نداء محمد ندیم په ټولنه کې د مسلکي اشخاصو، په ځانګړې ډول طب برخې پر ارزښت ټينګار وکړ.
هغه وویل: «اوس په افغانستان کې پخوانی حالت نه دی، اوس قوم او سمت اعتبار نه لري، بلکې استعداد، لیاقت او توانایي ته ارزښت ورکول کېږي. نو هر څومره زیاته توانایي چې ولرئ، په هماغه کچه به په نظام کې د خدمت زمینه درته برابره شي.»
د لوړو زده کړو سرپرست وزیر وویل چې موږ هڅه کوو د طب په برخه کې د ماسټري او دوکتورا په کچه له ګاونډیو هېوادونو سره ګډې برنامې ولرو، کار وکړو، چې عملاُ په دې برخه کې کار روان دی. نوموړي له فارغو شویو ډاکټرانو څخه وغوښتل چې له شته فرصت څخه په استفادې خپلو لوړو زده کړو ته دوام ورکړي، په لېسانس سند بسنه ونکړي او له خپل نظام څخه ملاتړ وکړي.
همدارنګه د کابل طبي علومو پوهنتون رئیس دوکتور مفتي اسدالله نجاد وویل چې د دغه پوهنتون له ۶ پوهنځيو څخه ۲۲۲ تنه ډاکټران فارغ شول، چې د لومړي ځل لپاره د طبي انجنیرۍ څانګې ۲۲ تنه محصلین هم پکې شامل دي.
د فراغتغونډې په پای کې د ریاست الوزراء سیاسي مرستیال مولوي عبدالکبیر، په داسې حال کې چې د لوړو زده کړو وزارت او کابل طبي علومو پوهنتون مشرتابه پلاوي یې ملتیا کوله، د نوښت او طبي وسایلو ډيزاین نندارتون څخه، چې د دغه پوهنتون طبي انجنیرۍ څانګې له لوري جوړ شوی و، لیدنه وکړه.
نېټه: سه شنبه
۱۴۴۶هـ.ق، د صفرالمظفر ۳۰مه
۱۴۰۳هـ.ش، د سنبلې ۱۳مه
۲۰۲۴م، د سپټمبر ۳مه
