په دغه ښوونیز ورکشاپ کې چې د لوړو زده کړو وزارت د مالي او حسابي ریاست له خوا د مالیې وزارت په همکارۍ جوړ شوی و، د هېواد د بېلابېلو زونونو د امارتي تحصیلي نهادونو او دیني جامعاتو د مالي برخو یو شېمر کارکوونکو ګډون کړی و.
د یاد ورکشاپ د پرانیستې په مراسمو کې د لوړو زده کړو وزارت مالي او اداري معین مولوي حافظ محمد حامد حسیب، په تحصیلي بنسټونو کې د معاشاتو (AFMIS) سیسټم کارولو او اهمیت په اړه خبرې وکړې.
هغه د اسلامي امارت له مشرانو څخه د مننې ترڅنګ وویل، چې د دغه سیسټم په پلي کېدو سره به د هېواد د تحصيلي نهادونو او دیني جامعاتو د کارکوونکو د معاشونو د ورکړې په برخه کې سرعت، دقت او شفافیت زیات شي. نوموړي دغه راز له ګډونوالو وغوښتل، چې له ياد ورکشاپ څخه اعظمي ګټه پورته کړي او په خپلو اړوندو ادارو کې يې پلی کړي.
ورپسې د لوړو زده کړو وزارت مالي او حسابي رئیس عبدالباري خپلواک خبرې وکړې او ویې ویل، چې په دې ورکشاپ کې به ګډونوالو ته د معاشونو نوی سیسټم په نظري او عملي توګه په پنځو ورځو کې تدریس شي، څو دوی وکولای شي یاد سیسټم په خپلو اړوندو ادارو کې پلی کړي. هغه زياته کړه، چې اوسمهال دغه سیسټم د ولايتونو په مستوفیتونو کې فعال دى.
د مالي او حسابي رئیس په وينا په راتلونکو پړاوونو کې به د هېواد ټولو امارتي تحصیلي نهادونو او ديني جامعاتو کې ورته ورکشاپونه جوړ شي او د معاشونو نوى سیسټم به عملي شي.
