د لوړو زده کړو وزارت په رهبرۍ د کابل پولي تخنیک پوهنتون له لوري د اوبو نړیوال درې ورځنی کنفرانس د ا.ا.ا لوړ پوړو مشرانو، داخلي او بهرنیو هېوادونو استادانو او متخصصینو په ګډون سره پیل شو
د دغه کنفرانس د پرانیستې په مراسمو کې، چې د لویې جرګې په تالار کې جوړشوي وو، د ریاست الوزراء اقتصادي مرستیال محترم ملا عبدالغني برادر، د کلیو د بیارغونې او پراختیا سرپرست وزیر مولوي محمد یونس اخندزاده، د لوړو زده کړو سرپرست وزیر محترم شیخ الحدیث مولوي نداء محمد ندیم، د لوړو زده کړو وزارت، د اوبو او انرژۍ، د بهرنیو چارو، او د کرنې، اوبو لګولو او مالدارۍ وزارتونو معین صاحبانو د امارتي او خصوصي تحصیلي نهادونو رهبرۍ او استادانو، له بهرنیو هېوادونو څخه راغلو استادانو او متخصصینو او همدارنګه د اوبو په چارو کې د ښکېلو مؤسسو استازو ګډون کړی و.
د اوبو نړیوال کنفرانس په پیل کې د ریاست الوزراء اقتصادي مرستیال محترم ملا عبدالغني برادر دغه کنفرانس په هېواد کې د اوبو ښه مدیریت لپاره مهم ګام یاد کړ او هیله یې څرګنده کړه چې په نورو پوهنتونونو کې هم دا ډول کنفرانسونه دائر شي.
د ریاست الوزراء اقتصادي مرستیال وویل چې اوبه د کمېدو په حال کې دي او د نړۍ پر سیاسي او اقتصادي اړیکو یې منفي اغېزې کړې دي. نوموړي زیاته کړه چې افغانستان په څېړنو کې ډېر کار ته اړتیا لري او په دې برخه کې یې د لوړو زده کړو وزارت هڅې وستایلې.
همدارنګه د لوړو زده کړو سرپرست وزیر محترم شیخ الحدیث مولوي نداء محمد ندیم وویل چې لوړو زده کړو وزارت د هېواد پر سترو او مهمو مسایلو ملي او نړیوال کنفرانسونه دایر کړي او دا لړۍ به دوام لري.
نوموړي زیاته کړه چې الله تعالی د اوبو پر ارزښت او سمې کارونې ټینګار کړی او ویې ویل، چې د قرانکریم په ۶۳ ایتونو کې الله تعالی د اوبو ذکر کړی دی.
دغه راز د لوړو زده کړو سرپرست وزیر له استادانو او متخصصینو وغوښتل چې د اوبو ښه مدیریت، وچکالۍ، سیلابونو او اقلیم بدلون ستونزو پر وړاندې د مبارزې لپاره څېړنې وکړي او د عملي کولو په پار یې له اړوندو ادارو سره شریکې کړي.
د کلیو د بیارغونې او پراختیا سرپرست وزیر مولوي محمد یونس اخندزاده وویل چې دا کنفرانس د خورا مهمې موخې لپاره جوړ شوی او د اوبو مدیریت د ا.ا.ا له بنسټیزو موخو څخه ده.
همدارنګه د ریاست الوزراء د دفتر رئیس ډاکټر ملا عبدالواسع د ریاست الوزراء محترم ملا محمد حسن اخند پیغام ولوست او ویې ویل چې د ا.ا.ا د اوبو مدیریت د وخت اړتیا بولي، د اوبو ښه مدیریت ته ژمن دی او له استادانو او متخصصینو څخه غواړي چې د اوبو نړیوال کنفرانس له لارې د اقلیم بدولون، وچکالۍ، او سیلابونو ستونزو ته علمي حلارې وړاندې او له اړوندو ادارو سره شریکې کړي. د اوبو او انرژۍ سرپرست وزیر، د کرنې، اوبو لګولو او مالدارۍ سرپرست وزیر او علومو اکاډمۍ پیغامونه هم ولوستل شول، چې په هېواد کې د پایدارې کرنې لپاره د اوبو پر اړتیا او په دې برخه کې پر علمي څېړنو ټينګار پکې شوی و.
د اوبو او انرژۍ وزارت د اوبو معین مجیب الرحمن عمر اخندزاده وویل چې د ا.ا.ا له حاکمیت وروسته د اوبو مدیریت ته ډېر کار او پاملرنه شوی ده. همدا راز د سیمي او نړۍ له هېوادونو یې وغوښتل چې اوبه سیاسي نکړي، ځکه دا یوه بشري موضوع ده او د ژوند بقاء تضمینوي.
د بهرنیو چارو وزارت اداري معین ډاکټر محمد نعیم د اوبو ارزښت په اړه د قرانکریم ایاتونو ته په اشارې سره د اوبو پر سمې کارونې ټنګار وکړ او زیاته یې کړه چې د اوبو د انصراف مخنیوي کې باید عامه پوهاوی وشي.
د کرنې، اوبو لګولو او مالدارۍ وزارت معین مولوي صدراعظم وویل چې افغانستان د اقلیم بدلون ستونزې له امله زیانمن شوی او که یې اوبه ښې مدیریت نه شي راتلونکي نسلونه د وچکالۍ سره مخ کېږي.
همدا راز د کابل پولي تخنیک پوهنتون سرپرست رئیس انجنیر سردارولي صالحي، د انګلستان، روسیې، فلپین او پاکستان هېوادونو استازو او متخصصینو خبرې وکړې او د اوبو ساتنه او مدیریت یې د ژوند د بقاء مهم عنصر یاد کړ.
د دغه کنفرانس موخې د داخلي او بهرنیو متخصصینو له لوري په افغانستان کې د اوبو اړوند شته ستونزو، ننګونو او خطرونو ته د رسېدنې په برخه کې د سیمې او نړۍ همکاري راجلبول، د علمي څېړنو، طرحو او پالیسیو جوړول او د عملي کولو په پار یې له سکتوري ادارو سره شریکول دي.
د کابل پولي تخنیک پوهنتون د اوبو نړیوال کنفرانس کې د داخلي استادانو سربېره د روسيې، ایران، امریکا، انګلستان، چک، سلواک، سریلانکا، پاکستان، هندوستان، نيپال، فلیپین او ترکیې هېوادونو استادانو او متخصصینو هم ګډون کړی دی.
د یادونې وړ ده چې د دغه کنفرانس په دریو ورځو کې به د اوبو اړوند ټولې ۱۳۵ مقالې وړاندې شي، چې ۳۵ یې د بهرنیو استادانو او متخصصینو لخوا په انلاین او حضوري بڼه وړاندې کېږي.
نېټه: دوشنبه
۱۴۴۶هـ.ق، د شعبان المعظم ۲۵مه
۱۴۰۳هـ.ش، د کب ۶مه
۲۰۲۵م، د فبروري ۲۴مه
