د لوړو زده کړو سرپرست وزیر محترم شیخ الحدیث مولوي نداء محمد ندیم په خپل کاري دفتر کې د یوناما له مرستیال اندریکا راتواته سره وکتل.
محترم سرپرست وزیر د یوناما مرستیال ته د ښه راغلاست ویلو ترڅنګ وویل خوښ یم چې د افغانستان واقعي وضعیت له نېږدې وینی. او دا ډېره مهمه ده څو نړیوالو ته د افغانستان ریښتینی حالت ورسېږي.
محترم سرپرست وزیر زیاته کړه، چې د لوړو زده کړو وزارت د تحصیلي نظام د اصلاح او پیاوړتیا لپاره اساسي اقدامات کړي دي. او دا وزارت غواړي چې واقعي، متخصص او مسلکي نسل وروزي.
هغه وویل، چې د همدې هدف لپاره، سږ کال د ۲۷۰ میلیونه افغانیو په ارزښت د لابراتورونو د تجهیز وسایل د هېواد تحصیلي نهادونو ته پېرل شوي دي.څو محصلین د نظري زده کړو ترڅنګ عملي مهارتونه هم ترلاسه کړي.
سرپرست وزیر وویل غواړي چې د افغانستان لوړې زده کړې د نړیوالو معیارونو سره برابرې شي، زاړه نصابونه نوي شي، او د لا معیاري تحصیلي نظام د برابرولو لپاره د بهرنیو استادانو جذب ته خاصه پاملرنه وشي.
هغه هیله وښوده، چې یوناما به د تحصیلي نظام د لا پیاوړتیا، د لابراتورونو تجهیز، او د تحصیلي مرکزونو لپاره د پرمختللو وسایلو برابرولو په برخه کې له دې وزارت سره همکاري وکړي.
په افغانستان کې د یوناما مرستیال، اندریکا راتواته، د محترم سرپرست وزیر له تود هرکلي مننه وکړه او د یوناما له لوري په افغانستان کې د بشري مرستو، زراعت، روغتیا او نورو ورته برخو کې یې د ترسره شویو فعالیتونو په اړه وضاحت ورکړ.
نوموړي وویل، چې یوناما غواړي د بشر دوستانه مرستو لپاره د لنډ مهاله اقداماتو پر ځای اوږد مهاله همکارۍ ته لومړیتوب ورکړي.
هغه ژمنه وکړه، چې د لوړو زده کړو وزارت د پیاوړتیا لپاره به له ایران، پاکستان ازبېکستان او نورو هېوادونو څخه د افغاني او بهرنیو استادانو جذب ته زمینه برابروي، او د تحصیلي نهادونو لپاره به د لابراتواري موادو او وسایلو برابرولو او انتقال برخه کې مرسته کوي.
