د كابل په پوهنتون کې د نابينايانو نړيواله ورځ (سپيڼه لکڼه) ونمانځل شوه
د كابل په پوهنتون کې د نابينايانو نړيواله ورځ (سپيڼه لکڼه) ونمانځل شوه.
په ياده غونډه کې د لوړو زده کړو نوماند سرپرست وزير دوکتور عباس بصير، د کابل پوهنتون رييس پوهاند محمد عثمان بابري، د عدليې وزارت د ټولنيزو چارو معينې ذکيې عادلي، د بشري حقونو کمېشنرې بنفشې يعقوبي، يو شمېر نابينايانو او د کابل پوهنتون يو شمېر استادانو او محصلينو ګډون کړی و.
د لوړو زده کړو نوماند سرپرست وزير نابينايانو ته د دوی د نړيوالې ورځې مبارکي وويله او د تحصيلي امکاناتو د برابرولو خبر يې ورکړ.
د لوړو زده کړو سرپرست وزير تحصيل د هېواد د هر وګړي حق وباله او زياته يې کړه چې د افغانستان اسلامي جمهوري دولت د قانون پر بنسټ مکلف دی چې د هېواد ټولو وګړو په ځانګړي ډول معلولينو ته د تحصيل اسانتیا برابره کړي. نوموړي له کابل پوهنتون څخه چې نابينايانو ته يې د تحصيل اسانتیا برابره کړې مننه وکړه او په دې پوهنتون کې يې د برېل کتابتون د افتتاح خبر ورکړ.
دوکتور عباس بصير زياته کړه چې د لوړو زده کړو وزارت تیار دی څو ډېر ژر د معلولينو او په ځانګړي ډول د روښان زړو (روشن دلان) اړتیاوې لکه د ځانګړي تحصیلي نصاب برابرول، غږيز وسايل او د دوی ټولې اړتیاوې ورته برابرې کړي.
د کابل پوهنتون رييس پوهاند محمد عثمان بابري وويل چې معلوليت لرونکي محصلين زحمت ويستونکي او هڅه کوونکي دي، زياته يې کړه چې د کابل پوهنتون په بېلابېلو څانګو کې ۷۱ تنه معلولين چې له دې ډلې څخه يې ۲۲ تنه نابينا او ۱۹ تنه يې کاڼه دي زده کړې کوي.
بابري وويل چې د کابل پوهنتون نابينا محصلين د نورو محصلينو په څېر زحمت ګالي او تل د مطلوبو تحصيلي شرایطو د برابرولو او د خنډونو د له منځه وړلو له پاره هڅې کوي چې زموږ د پوهنتون له پاره د وياړ وړ دي.
د عدليې وزارت د ټولنيزو چارو معينې ذکيې عادلي هم په دې اړه وويل چې د معلوليت له ډلې نابينايي لوړو هدفونو ته د نه رسېدو لامل نه کېږي، لکه څنګه چې د برېل خط مخترع لويي برېل، یوناني مشهور شاعر هومر او د فارسي شعر پلار ابو عبدالله رودکي هم نابینايان وو.
د عدليې وزارت د ټولنيزو چارو معينې وويل چې په عدليې وزارت کې د معلولانو د حقوقو قانون تر کار لاندې دی او په دې قانون کې د وړيا لوړو زده کړو، د دوی له پاره بوختيا او مالي ملاتړ، په دولتي ادارو کې د معلوليت لرونکو کسانو په کار ګمارنه او د ډېرو نورو چارو اسانتیاوې په پام کې نيول شوې دي.
د بشري حقوقو کمېشنرې بنفشې يعقوبي هم نابينايانو ته د دې ورځې مبارکي وويله او د معلولينو د ملاتړ غوښتنه يې وکړه. نوموړې زياته کړه چې له معلوليت لرونکو کسانو سره بايد د بشپړو ټولنيزو او وګړنيزو حقوقو له مخې چلند وشي او د دوی له پاره د تعليم او تحصيل ځانګړي شرایط برابر شي.
