لوړو زده کړو وزیر د زابل له والي سره وکتل
د لوړو زده کړو وزیر ډاکټر عباس بصير په خپل دفتر کې د زابل له والي، په ولسي جرګه کې د دې ولايت د خلکو له استازې او د ميرويس نيکه د لوړو زده کړو موسسې له رييس سره وکتل.
د کتنې په پيل کې د زابل ولايت والي جنرال احمدګل رسولي او زهرا توخي په یاد ولایت کې د تحصيلي او تعليمي شرایطو او په دې برخه کې يې د شته ستونزو په اړه معلومات وړاندې کړل.
دوی څرګنده کړه چې د زابل ولايت د پوهنې سېستم د معياري کولو په برخه کې مسلکي کادرونو ته اړتیا لري، چې لوړو زده کړو وزارت د دې هدف د پوره کولو له پاره د زابل ولايت ښوونکو ته د تحصيلي اسانتياوو په برابرولو سره مرسته کولای شي.
همداراز د ميرويس نيکه د لوړو زده کړو موسسې رييس پوهنيار احمد الله کاکړ، د دې موسسې د اړتیاوو په اړه چې د تدريسي، اداري ودانیو نه لرل، د پښتو، انګریزي او ديني زده کړو د څانګو جوړول، د اداري او کادري بستونو زياتول، د شپې پوهنځيو جوړول او د دې موسسې د نورو اړتیاوو په اړه يې معلومات وړاندې کړل.
د لوړو زده کړو وزير ډاکټر عباس بصير د دوی غوښتنې او ستونزې له اوریدو وروسته، د زابل له والي او د زابل ولايت د لوړو زده کړو موسسې له مسوولينو يې د دې ولايت د تعليمي او تحصيلي نظام پياوړتيا ته د دوی د پاملرنې له کبله مننه وکړه.
د لوړو زده کړو وزير وویل چې د خپلو هغو ژمنو پر بنسټ چې د جمهوري رياست د عالي مقام له رهبري، په ملي شورا کې د خلکو له استازو او افغان ولس سره یې کړې دي، هغه دا چې د هېواد د تحصيلي بنسټونو د پراختيا او د متوازن پرمختګ په برخه کې به له هېڅ ډول هڅو درېغ نکوي.
ډاکټر عباس بصير همداراز د اداري او تدريسي ودانيو په اړه وويل چې د د دې وزارت مالي او اداري معينيت ته يې دنده سپارلې چې د تحصيلي بنسټونو د ودانيو د پروژو موضوع د ښار جوړولو له وزارت سره له نژدې وڅاري، نوموړي همدازار د دوی د غوښتنو په اړه څرګنده کړه چې د لوړو زده کړو وزارت به د وړاندې شوو اړتیاوو د ترسره کولو له پاره د امکاناتو په پام کې نيولو سره اقدام وکړي.
