د دولتي ادارو داخلي تفتیش د فعالیتونو لارښود مسودې په اړه بحث وشو
نن په کابل سټارټ هوټل کې د یوه محفل پر مهال د دولتي ادارو د کورني تفتیش د فعالیتونو لارښود پر مسودې بحث وشو.
د لوړو زده کړو وزارت کورني تفتیش مشر غلام داوود شایق د کورني تفتیش د فعالیتونو لارښود تدوین او ترتیب د افغانستان په ادارو کې د تجربو د لېږد او کورني تفتیش په موخه اړین وباله.
هغه ټینګار وکړ چې د کورني تفتیش په ادارو کې له اداري فساد سره د مبارزې مسلکي او اساسي ظرفیت شته او په دې برخه کې همغږي کولی شي چې د افغانستان په حقوقي نظام کې د سټنډرډ کولو او د جوړښتونو او منځپانګې په بډاینه کې اغېزناک واوسي.
داوود شایق وویل، چې د لوړو زده کړو وزارت د کورني تفتیش په برخه کې منشورونه، دستورونه او لارښوونې تر سره کړي او له اړوند ادارو سره د دغو تجربو شریکول به د دې لامل شي چې د مسلکي تفتیش کوونکو ظرفیت لوړ کړي.
هغه زیاته کړه چې د لوړو زده کړو وزارت د کورني تفتیش د لارښود د چمتو کولو په برخه کې هراړخېزې همکارۍ ته تیار دی او همدارنګه دې ته ژمن دی چې د یوه داسې چوکاټ په جوړولو کې خپله ونډه واخلي، چې د تفتیش ادارو اړتیاوو ته ځواب ووایي.
دغه راز د تفتیش په چارو کې د امانت پروژې ستر سلاکار عبدالهادي فرهنګ هم د کورني تفتیش د فعالیتونو د تدوین په برخه کې وینا وکړه او زیاته یې کړه چې د دغه کار ګډه موخه په ادارو کې د یاد لارښود پلي کول، پروګرام جوړول، ساحوي کار او راپور ورکول دي.
د فرهنګ په وینا د کورني تفتیش د فعالیتونو لارښود د امانت پروژې، لوړو زده کړو، شهیدانو او معلولینو، کډوالو او راستنېدونکو وزارتونو او ځینو نورو ښکېلو ادارو په ملاتړ په څلور څپرکو کې تدوین شو. دغه راز د هېواد په رسمي او انګرېزي ژبو به د ګټې اخیستنې لپاره د ټولو تفتیش کوونکو د لاسرسي وړ وي.
