د دوو تدارکاتي پروژو هوکړه لیک لاسلیک شو
د لوړو زده کړو وزارت مالي او اداري معینیت سرپرست او قراردادي شرکتونو ترمنځ نن د دوو تدارکاتي پروژو هوکړه لیکونه لاسلیک شول.
په دغو پروژو کې د کندهار، نورستان، زابل، فراه، پکتیا، دایکندي، بلخ او هلمند ولایتونو په پوهنتونو او د لوړو زده کړو موسسو کې په ټولیزه توګه د څه دپاسه ۵ میلیونو او ۳۷ زرو افغانیو په ارزښت د سولر سیسټم نښلول او د څه دپاسه ۶۵۶ زرو افغانیو په ارزښت د لوړو زده کړو وزارت مرکز لپاره د Google G Suite له لارې د الکترونیکي مراسلاتو تخنیکي خدمتونو پروژه شامله ده.
د لوړو زده کړو وزارت د تهیه او تدارکاتو ربیس او مالي او اداري معینیت سرپرست عبدالله صوفي زاده د دې تړون د لاسلیکولو په مراسمو کې په داسې حال کې چې د معلوماتي ټکنالوژۍ او زېربناوو او اداري رییسانو شتون درلود ګټونکو شرکتونو ته د مبارکۍ ویلو ترڅنګ یې له هغوی وغوښتل چې د تړون له شرایطو سره سم د خپلو پروژو پر پلي کولو کې جدي واوسي، په وخت یې بشپړ او ګټې اخیستنې ته چمتو کړي.
عبدالله صوفي زاده وویل چې تړون کوونکي شرکتونه به پروژې د اړوندو ریاستونو په همغږۍ مخته وړي او دغه ریاستونه به د دوی د کارونو کیفیت څاري.
د معلوماتي ټکنالوژي او اداري او زېربنا رییسانو هم د پلي کوونکو شرکتونو څخه وغوښتل چې د خپلو پروژو په وخت او کیفیت لرونکي پلي کولو کې جدي واوسي.
د شرکتونو استازو هم ژمنه وکړه چې د تړون په پلي کولو او په ټاکلي وخت د پروژو په بشپړولو کې به جدي او ځوابویونکي وي.
