لوړو زده کړو وزارت ولس ته د دولت حساب ورکولو برنامه کې د (۱۱) تر ټولو غوره ادارو په ډله کې راغلی دی
اطلاعاتو ته د لاسرسي کمېسیون په خپل تازه راپور کې ویلي؛ چې لوړو زده کړو وزارت د حساب ورکولو په برخه کې تر اویا سلنې لوړ شاخصونه په پام کې نیولي چې له امله یې د یوولس عالي ادارو په ډله کې راغلی دی.
د دغه کمېسیون د راپور پر بنسټ د لوړو زده کړو وزارت په ګډون ۱۱ ادارو هغه شاخصونه په پام کې نیولي وو چې له مخې یې یوه اداره په عالي درجه بندۍ کې راځي.
له دې سره د لوړو زده کړو وزارت ویاند او د نشراتو سرپرست رییس پوهنیار حامد عبیدي وايي؛ چې دوی تل هېوادوالو ته د اطلاع رسونې او خدماتو وړاندې کولو برخه کې د اسانتیاوو رامنځ ته کولو هڅه کړې ده.
"موږ تل هڅه کړې چې هېوادوالو ته ښه اطلاع رسونه وکړو او خدمات وړاندې کړو، د لوړو زده کړو وزارت مشرتابه ټینګار پر همدې دی چې هېوادوال زموږ له اطلاع رسونې راضي وي. ولس ته د دولت حساب ورکولو په برنامه کې مو پوره هڅه وکړه چې خلکو ته د وړاندې شویو خدمتونو په اړه معلومات ورکړو چې له نېکه مرغه اطلاعاتو ته د لاسرسي کمېسیون راپور کې د لوړو زده کړو وزارت په یوولس غوره او عالي ادارو کې راغلی دی."
ولس ته د دولت حساب ورکولو برنامه کې ۶۴ بېلابېلو ادارو ګډون کړی و چې له هغو څخه د لوړو زده کړو وزارت په ګډون ۱۱ ادارو عالي درجه خپله کړه.
