د لوړو زده کړو وزارت علمي معین د فراه ولایت ټولنیزو چارو مرستیالې سره وکتل
د لوړو زده کړو پر بنسټونو پانګونه او په دغو بنسټونو کې د ښځو زیاتوالي ته پاملرنه د لوړو زده کړو وزارت له کاري لومړيتوبونه څخه دي.
دغه ټکی د لوړو زده کړو وزارت علمي معین پوهنمل عبدالتواب بالاکرزي د فراه ولایت مقام ټولنیزو او اقتصادي چارو مرستیالې مېرمن سهیلا مومن سره لیدنې پر مهال څرګند کړ.
د فراه ولایت مقام اقتصادي او ټولنیزو چارو مرستیالې مېرمن سهیلا مومن د فراه د لوړو زده کړو په موسسه کې د علمي، اداري او زیربناوو په برخه کې لاسته راوړنې او پرمختګونه تشرېح کړل او یاده موسسه کې یې د ښځو شمېر کم وباله.
نوموړې په دې موسسه کې د ښځو د شمېر کمښت لاملاند بېوزلي، ناامني، د کورنیو لخوا ښځينه اولاد د زده کړو دوام لپاره نه هڅول او ټرانسپورټي سیسټم نه شتون وښود او ویې ویل چې د فراه ولایت مقام چمتو دی چې د لوړو زده کړو وزارت سره په همکارۍ او نورو اړوند ادارو په مرسته د فراه لوړو زده کړو موسسه کې د ښځو د شمېر زیاتوالي لپاره ګډ کار وکړي.
د لوړو زده کړو وزارت علمي چارو معین عبدالتواب بالاکرزي په داسې حال کې چې د دولتي زدکړیالانو چارو رییس پوهنوال محمد شریف امین او د خصوصي زدکړیالانو چارو رییس پوهندوی دوکتور خیبر سیفي هم شتون درلود، ولایتي پوهنتونونو او موسسو پراختیا ته پاملرنه او د ښځو زیاتوالي لپاره لار هوارول د لوړو زده کړو وزارت د کاري لومړیتوبونو په توګه یاد کړل او ویې ویل چې دا کار د لوړو زده کړو په زیاترو ولایتي بنسټونو کې ترسره شوی او له دې سره همهاله هڅه کېږي چې د پنځوس سلنه تخفیف رامنځته کولو سره به د لرې پرتو ولایتونو څخه د دولتي لوړو زده کړو په بنسټونو کې د ښځو جذب کچه لوړه شي.
ورسره پوهنمل عبدالتواب بالاکرزي وویل چې د دولتي کانکور ازموینې په پروسه کې به د ښځو لپاره ۱۰ سلنه تخفیف په ټولو څانګو کې په پام کې ونیول شي چې د ښځو شمېر د لوړو زده کړو په بنسټونو کې زیات شي.
د دولتي زدکړیالانو چارو رییس پوهنوال محمد شریف امین او خصوصي زدکړیالانو چارو رییس پوهندوی دوکتور خیبر سیفي هم په خصوصي دولتي بنسټونو کې د ښځو د شمېر زیاتوالي لپاره خپلې طرحې او لارې چارې تشرېح کړې او ډاډ یې ورکړ چې د اړوندو ادارو سره په همکارۍ کې د ښځو ظرفیت لوړولو او په ولایتونو کې د لوړو زده کړو دولتي او خصوصي بنسټونو کې یې د جذب زیاتوالي لپاره ځانګړي پروګرامونه په پام کې دي.
