له لوړو زده کړو سرپرست وزیر مولوي عبدالباقي حقاني سره د المان ستراتیژیکې پراختیایي کمپنۍ د آسیایي څانګې مسوولانو وکتل
۱۴۰۰کال، د لړم ۲۶مه
له لوړو زده کړو سرپرست وزیر مولوي عبدالباقي حقاني سره د المان ستراتیژیکې پراختیایي کمپنۍ د آسیایي څانګې مسوولانو وکتل.
دغه ناسته چې د لوړو زده کړو وزارت په مقام کې تر سره شوه، د یادې کمپنۍ مسوولانو له لوړو زده کړو وزارت سره په مختلفو برخو کې د همکارۍ تیاری وښود. د لوړو زده کړو سرپرست وزیر د آلمان له همکارۍ څخه مننه وکړه او ویې ویل چې دغه وزارت اوږدمهاله او لنډمهاله مرستو ته اړتیا لري، نوموړي زیاته کړه، چې د ځینو پوهنتونونو د ساختماني پروژو تکمیلول، د کابل پوهنتون معیاري کول او د پوهنتنونونو د انټرنيټي سیسټمونو ځواکمنتیا زموږ له لومړیتوبونو او عاجلو اړتیاوو څخه دي.
د لوړو زده کړو وزارت سرپرست د خپلو خبرو په دوام کې وویل چې اوسمهال خصوصي پوهنتونونه د محصلانو پر مخ واز دي او د دولتي پوهنتونونو د بندېدو دلیل اقتصادي ستونزې دي.
وروسته په افغانستان کې د المان د ستراتیژیکې پراختیا کمپنۍ رییس حشمت الله مرادي وویل، چې د لوړو زده کړو وزارت پروګرامونه او اړتیاوې به وڅېړو او د پلي کولو او عملي ګامونو اخیستلو په برخه کې به یې په راتلونکې ناسته کې خبرې وکړو. په دغه ناسته کې د المان ستراتیژیکې پراختیا کمپنۍ وکیل او سلاکار اولیفِر له لوړو زده کړو وزارت سره د خپلو همکاریو ډاډ ورکړ.
