د لوړو زده کړو وزارت د تضمین کیفیت او اعتبار ورکولو ریاست په مشرۍ جوړ شوی ورکشاپ د ټولو معیارونو په تشریح کولو...
۱۴۰۰کال، د سلواغې ۷مه
د لوړو زده کړو وزارت د تضمین کیفیت او اعتبار ورکولو ریاست په مشرۍ جوړ شوی ورکشاپ د ټولو معیارونو په تشریح کولو سره پای ته ورسید.
د لوړو زده کړو وزارت د تضمین کیفیت او اعتبار ورکولو ریاست له لوري په ننګرهار پوهنتون کې درې ورځنی ورکشاپ پای ته ورسېد، چې د ننګرهار پوهنتون سربېره د ختیځو ولایتونو د دولتي او خصوصي پوهنتونونو او لوړو زده کړو موسسو مسؤلینو هم ګډون پکې کړی و.
په همدې موخه جوړو شوو مراسمو کې د لوړو زده کړو وزارت د تضمین کیفیت او اعتبار ورکولو رئیس شاکر وحیدي له ګډونوالو وغوښتل چې، په خپلو پوهنتونو کې اداري او تدریسي کارکوونکو ته د پوهاوي سمینارونه جوړ کړي او د معیارونو عملي کېدو لپاره باید جدي هڅې وشي.
نوموړي دا هم وویل، چې د لوړو زده کړو وزارت رهبري د تحصیلي موسساتو د کیفیت ښه والي او معیاري کېدو په برخه کې په پوره ژمنتیا او جدیت ګامونه اخلي.
ښاغلي وحیدي وویل، چې له اوسنیو ستونزمنو او بحراني حالاتو څخه د هېواد د رایستلو لپاره علمي او مسلکي کادرونو ته اړتیا ده او د هېواد د پرمختګ لپاره باکیفیته او معیاري پوهنتونونو ته اړتیا ده.
دغه راز د ننګرهار پوهنتون علمي چارو مرستیال احسان الله ناصح او د الفلاح پوهنتون علمي چارو معاون خبرې وکړې. یادو ګډونوالو د لوړو زده کړو وزارت او په ځانګړې توګه د تضمین کیفت ریاست دا ډول فعالیتونو ترسره کول وستایل او ډاډ یې څرګند کړ چې تشریح شوي معیارونه به په خپلو پوهنتونو کې عملي کوي.
ددې ترڅنګ د لوړو زده کړو وزارت د تضمین کیفیت او اعتبار ورکولو رئیس شاکر وحیدي د ختیځ زون له (ننګرهار، لغمان او کونړ) دولتي او خصوصي پوهنتونونو څخه هم لیدنه وکړه، چې مسؤلینو ته یې لازمې سپارښتنې وکړې او د هغوی ستونزې یې واورېدې، چې د حل کېدو ډاډ یې ورکړل شو.
د ورکشاپ په پای کې ګډونوالو ته تصدیق پاڼې ووېشل شوې.
