د هېواد د پوهنتونونو د ساینس برخو (ریاضي، فزیک، کیمیا او بیولوژي) څانګو د تحصیلي نصاب د بیاکتنې او پراختیا پینځه...
یکشنبه، ۱۴۰۰ کب ۸ مه
د هېواد د پوهنتونونو د ساینس برخو (ریاضي، فزیک، کیمیا او بیولوژي) څانګو د تحصیلي نصاب د بیاکتنې او پراختیا پینځه ورځنی کلسټر پيل شو.
په همدې موخه جوړه شوې ناسته کې د لوړو زده کړو وزارت علمي معین لطف الله خیرخواه، د تحصیلي نصاب رئیس عبدالرؤف فراهي، د بشري سرچینو رئیس محمد ادریس اخندزاده، د تضمین کیفیت رئیس شاکر وحیدي، استادانو او د یو شمیر پوهنتونونو مسؤلینو ګډون کړی وو.
په دې غونډه کې د لوړو زده کړو وزارت علمي معین لطف الله خیرخواه وویل: داچې د یوه هېواد پرمختګ د هغه هېواد له تحصیلي بنسټونو سره تړاو لري؛ نو باید داسې یو تحصیلي نصاب ولرو، چې پر بنسټ یې خپلو هېوادوالو او انسانیت ته خدمت وکړای شو.
نوموړی عصري زده کړده کړې له دیني زده کړو جلا نه بولي او زیاتوي، دا چې په نړۍ کې ډېر علوم شتون لري؛ خو انسان په یوه وخت نشي کولی چې د نړۍ ټول او یا زیات علوم زده کړي، نو په همدې اساس د علومو تقسیم بندي شوې، خو دا له یوه بل سره جلا نه دي.
ښاغلي خیرخوا دا هم وویل، که علم د الله ج د رضاء او هېوادوالو او بشریت ته د خدمت په موخه زده کړل شي، دا خپله عبادت دی.
د لوړږ زده کړو معین د خپلې وینا په وروستۍ برخه کې د کلسټر په ګډونوالو غږ وکړ، چې د نصاب په تجدید کې له پوره اخلاص، صداقت او دقت څخه کار واخلي او هېوادوالو ته داسې یو نصاب وړاندې کړي چې د اخروي ژوند لپاره یې جاریه صدقه شي او اوسنیو مسایلو ته ځواب ویونکی، په نړيوالو معیارونو برابر او د افغاني کلتور سره په ټکر کې نه اوسي.
بلخوا بیا د لوړو زده کړو وزارت د تحصیلي نصاب رئیس عبدالرؤف فراهي وویل، چې نن سبا افغان زده کړیالان په بهرنیو هېوادونو کې په تحصیلي برخو کې ځکه له ستونزو سره مخ کېږي، چې هغو هېوادونو ته د افغانستان اوسنی نصاب او میتود د منلو نه دی، خو موږ به د نصاب په تجدید کې دې ټولو خبرو ته پام وکړو.
یاده دې وي چې تېره اونۍ د هېواد د پوهنتونونو معالجوي طب پوهنځی د نصاب د بیا کتني کلسټر دویم پړوا ترسره شو.
