د ساینس پوهنځی (ریاضي، فزیک، کیمیا او بیولوژي) څانګو د تحصیلي نصاب د بیاکتنې او پراختیا اول دور کلسټر په بریالۍ توګه پای ته ورسېد
۱۴۰۰کال، د کب ۱۲مه
د ساینس پوهنځی (ریاضي، فزیک، کیمیا او بیولوژي) څانګو د تحصیلي نصاب د بیاکتنې او پراختیا اول دور کلسټر په بریالۍ توګه پای ته ورسېد.
په دغه کلسټر کې له اجنډا سره سم، د کلسټر غړو د یادو څانګو تحصیلي موخې، لیدلوری، د تدریس شیوه، د محصلانو ارزونه، په دریو ژبو پښتو، دري او انګلیسي د سمستر وار درسي پلان جوړول او نورو اړوندو موضوعاتو د ۵ورځو په جریان کې هر اړخیز بحثونه وکړل.
په دغه ناسته کې د لوړو زده کړو وزارت علمي معین دوکتور لطف الله خیرخواه دې ته په اشارې سره چې علم جاریه صدقه ده، زیاته کړه چې موږ باید د علم د پراختیا لپاره هڅه وکړو، ځکه له علم پرته د انسانیت د فضیلت ساتل ناممکن دي. نوموړي د تحصیلي نصاب له رئیس، د تحصیلي نصاب د کمیسیون له غړو او د اړوندو ادارو له مسؤلانو د مننې تر څنګ، د نصاب په بیاکتنه او پراختیا کې پر زیاتې پاملرنې ټینګار وکړ او ویې ویل چې نصاب د هېواد په کچه یوه مهمه او بنسټيزه مسأله ده.
