د امارتي پوهنتونونو الکترونکي زده کړو بورډ مسئولینو او په سیسټم کې شاملو استادانو لپاره د لوړو زده کړو د ښوونیز مدیریت نوي سیسټم د پېژندنې او کارولو درې ورځنی ورکشاپ پای ته ورسېد.
یاد ورکشاپ د لوړو زده کړو وزارت د علمي برنامو پراختیا ریاست له لوري د کابل ښوونې او رزونې په پوهنتون کې د مرکزي او یو شمېر ولایتي امارتي تحصیلي بنسټونو د الکترونیکي زده کړو اړوند مسؤلینو لپاره جوړ شوی و او موخه یې د (HELMS) لوړو زده کړو مديرتي سیسټم د پلي کولو څرنګوالی، د برېښنايي زده کړو له بنسټیزو مفاهیمو سره اشنا کېدل، د سیسټم د کارولو څرنګوالی، د داخلي کورسونو جوړول او د تدریسي موادو ترتیبول و.
د ورکشاپ په پای کې د لوړو زده کړو وزارت علمي معین دوکتور لطف الله خیرخواه د کرونا وباء او د حضوري درسونو پر وړاندې ځينو نورو خنډونو ته په اشارې سره برېښنایي زده کړې د اوسنۍ نړۍ جدي اړتیا وبللې او ویې ویل چې لوړو زده کړو وزارت هم په دې برخه کې کار پیل کړی او ډېر ژر به د برېښنایي زده کړو لپاره اسانتیاوې برابرې کړي.
دغه راز د لوړو زده کړو وزارت علمي معین د هېواد نورو زونونو په تحصیلي بنسټونو کې هم د دا ډول ورکشاپونو د جوړولو خبر ورکړ او په دې برخه کې یې د وزارت له لوري د پوره همکارۍ ډاډ ورکړ.
