د کابل طبي علومو پوهنتون د انټي میکروب درملو په وړاندې د میکروبونو مقاومت په اړه لومړنی کلنی کنفرانس جوړ کړ.
د کابل طبي علومو پوهنتون دغه کنفرانس د انټي بیوټیک درملو د کارونې په اړه د پوهاوي لوړولو او د انټي بیوتیک د خپلسري استعمال د زیانونو په اړه د دې بنسټ د علمي کادرونو لخوا د ترسره شویو څېړنو پایلو شریکولو په موخه جوړ شو.
په دې کنفرانس کې د لوړو زده کړو وزارت ستر سلاکار مفتي محمد انور معتصم بالله خبرې وکړې هغه دا ډول کنفرانسونه په هېواد کې د طب په برخه کې د پرمختګ او پر ځان بسیاینې لپاره مهم وبلل.
همدارنګه د کابل طبي علومو پوهنتون رئیس ډاکټر مفتي اسدالله نجات هم د انټي بیوټیکونو کارول د انسان د ژوند لپاره مهم وبلل او ویې ویل چې د انټي بیوټیک درملو د استعمال په اړه باید سم پوهاوی ورکړل شي.
د يادونې وړ ده، چې په افغانستان کې د انټي بيوټيکو استعمال اغېز نه لرل په یوه ګواښ بدل شوی او خلک بايد په خپلسري او ناسم ډول د دغو درملو له کارولو په کلکه ډډه وکړي، په همدې اړه په یاد کنفرانس کې د کابل طبي علومو پوهنتون استادانو له لورې څېړنېزې مقالي وړاندې شوې.
