د رياست الوزراء سياسي مرستيال خوست ولایت ته د خپل سفر په ترڅ کې د شيخ زايد پوهنتون څخه ليدنه وکړه.
په یاده غونډه کې د ا.ا.ا ریاست الوزراء سياسي مرستیال مولوي عبدالکبیر، د امر بالمعروف، نهي عن المنکر او د شکایتونو اوریدلو وزیر شیخ الحدیث خالد حنفي، انس حقاني، ولایتي مسؤلینو، د شیخ زايد پوهنتون رهبري او استادانو، د خوست ولایت د بېلابېلو ادارو مسؤلینو او قومي مشرانو ګډون کړی و.
د ا.ا.ا د ریاست الوزراء سياسي مرستیال مولوي عبدالکبیر په خپلو خبرو کې وویل، امارت له نړۍ او په خاص ډول له ګاونډیو هېوادونو سره ښه تعامل لري، د ښه تعامل له وجې له ګاونډیو هېوادونو سره سوداګریزې اړیکې ښې پر مخ روانې دي، نوموړي زياته کړه، چي د هېواد د آبادۍ په برخه کې به د اوبو مدیریت لپاره راتلونکې کال کې ۴۰۰ چیکډیمونه جوړ شي.
وروسته انس حقاني په خپلو خبرو کې وويل، یوه ټولنه هغه وخت کې ترقي کوي؛ چي امنيت او استقلالیت ولري، نوموړي له ټولو ګډنوالو غوښتنه وکړه، چې د هېواد په هره برخه کې خدمت کوئ؛ نو اخلاص په پام کې نیسئ.
ورپسې د شیخ زايد پوهنتون رئیس شیخ الحدیث مسلمين راشد میلمنو ته د ښه راغلاست تر څنګ د شیخ زاید پوهنتون پر مخينې، لاسته راوړنو او ستونزو خبرې وکړې.
