د افغان نړیوال پوهنتون د طب، انجنیرۍ او زراعت فوق لېسانس برنامو د تحصیلي نصاب د ترتیب او چمتو کولو کلستر دایر شو.
په همدې موخه جوړه شوې غونډه، چې د قران اعظیم الشان په مبارکو ایاتونو سره پیل شوه، د لوړو زده کړو وزارت د تحصیلي نصاب رئیس عبدالرؤف فراهي، د ملي نصاب غړو، د هېواد کادري غړو او د هېواد بېلابېلو پوهنتونونو استادانو ګډون کړی وو.
د غونډې د پرانېستې وینا د لوړو زده کړو وزارت د تحصیلي نصاب رئیس عبدالرؤف فراهي وکړه او ګډونوالو ته یې د ښه راغلاست ترڅنګ، د افغان نړیوال پوهنتون د طب، انجنیرۍ او زراعت فوق لېسانس برنامو د تحصیلي نصاب د ترتیب او چمتو کولو په اړه هر اړخیز معلومات وړاندې کړل.
نوموړي تحصیلي نظام د یوه هېواد د ملا تیر یاد کړ او زیاته یې کړه، چې یو تحصیلي نظام په معیاري تحصیلي نصاب پیاوړی کېږي.
همدارنګه ښاغلي فراهي له ګډونوالو وغوښتل، چې د نصاب ترتیب او چمتو کولوبرخه کې له پوره صداقت، ایماندارۍ او حوصله مندۍ څخه کار واخلي.
د اجنډا مطابق په یاده غونډه کې، د ملي نصاب غړي داؤد شاه فاروق د دغه کلستر پر پروسې رڼا واچوله او په وروستیو کې یې د ګډونوالو پوښتنو ته ځوابونه ورکړل.
د لوړو زده کړو وزارت په هڅو تر دې وړاندې هم د طب، ساینسي، فارمسي، ویترنري، کمپیوټر ساینس پوهنځیو او د تخصصاتو پنځه برنامو لپاره د نصاب بیا کتنه، ترتیب او د چمتو کولو چارې ترسره شوې دي.
