د جاپان سفیر د لوړو زده کړو سرپرست وزیر سره وکتل.
یاده ناسته چې د لوړو زده کړو سرپرست وزیر الحاج مولوي عبدالباقي حقاني په مشرۍ ترسره شوه، په کې د کابل پوهنتون رئیس دوکتور اسامه عزیز، د لوړو زده کړو وزارت د خصوصي محصلانو چارو رئیس سید اسماعیل روحاني، د لوړو زده کړو وزارت د بهرنیو اړېکو او بوروسونو د تنظیم رئیس نظر محمد عرفان، د کابل طبي پوهنتون رئیس فضل الرحمن رحماني او د جاپان سفیر (تاکاشي او کادا) او ورسره پلاوي ګډون کړی وو.
په دې ناسته کې د لوړو زده کړو سرپرست وزیر الحاج مولوي عبدالباقي حقاني د افغانستان او جاپان اړېکې مهمې وبللې او په تحصیلي او تدریسي برخو کې یې ترې د همکارۍ غوښتنه وکړه.
ښاغلي حقاني زیاته کړه، چې یو اباد افغانستان د سیمې او نړۍ هېوادونو لپاره مهم دی او دا هېواد په تحصیل سره ابادیدای شي،چې باید نړیوال ورته پوره پاملرنه وکړي.
په افغانستان کې د جاپان سفر(تاکاشي او کادا) د لوړو زده کړو له سرپرست وزیر څخه د وخت ورکولو د مننې ترڅنګ په تحصیلي او روغتیايي برخو کې د همکارۍ ډاډ څرګند کړ.
نوموړي د لوړو زده کړو سرپرست وزیر په کارپوه، مسلکي، هېواد ته ژمن او د محصلانو پرمخ د خصوصي او دولتي پوهنتونو خلاصونکی شخص یاد کړ.
دغه راز د جاچان سفیر د تحصیلي برخې پیاوړتیا لپاره د افغانستان او نړیوالو هېوادونو اړېکې قوي کول مهمې وبللې او زیاته یې کړه ، " موږ د باثباته افغانستان جوړولو په هڅه کې یوو."
د یادونې وړ ده چې د لوړو زده کړو سرپرست وزیر الحاج مولوي عبدالباقي حقاني د هېواد تحصیلي بنسټونونو د تقویت په موخه یو شمیر هېوادونو ته سفرونه کړي او ډېر کله یې د سیمې او نړۍ هېوادونو استازو سره د هېواد په ننه کې ناستې ترسره کړي، چې ښې پایلې یې لرلي دی.
