د (د ابن سینا لارویان) په نوم مجله چې د کابل طبي علومو پوهنتون له لوري خپریدله، له لسو کلونو ځنډ وروسته بیا پیل شوه.
په همدې اړه د کابل طبي علومو پوهنتون کې غونډه جوړه شوې وه چې ویناوالو په ټولنه او تحصیلي بنسټونو کې د چاپي خپرونو پر ارزښت خبرې وکړې.
په پیل کې د کابل طبي علومو پوهنتون ریس ښاغلي فضل رحمان رحماني له هغو څخه مننه وکړه چې د دې مجلې په بیا پیلیدو کې يې برخه اخستې وه او زیار یې ویستلی و، هغه وویل، په دې مجله کې به د طبي موضوعاتو تر څنګ د کابل طبي علومو پوهنتون لاسته راوړنې او فعالیتونه خپریږي.
هغه له ټولو استادانو او محصلانو څخه وغوښتل چې د دې مجلې په بډایه کولو کې مرسته وکړي.
وروسته محمد اشرف غیرت د کابل پوهنتون مالي او اداري معاون، پوهاند شمس الرحمن رحماني، محمد فرید برنایار او څو تنو نورو د خوښۍ تر څنګ د دې مجلې له مسولینو سره خپل نظرونه او وړاندیزونه شریک کړل.
همدارنګه صبغت الله سجاد د کابل طبي پوهنتون د اطلاعاتو او نشراتو آمر او د ابن سینا لارویانو مجلې مدیر مسؤل د مجلې محتوا، د نشراتي بورد غړي او چاپي خپرونو پر ارزښت خبرې وکړې.
هغه وویل چې په دې چاپي خپرونه کې به علمي، کلتوري، دینی، ټولنیز او خبرې موضوعات د استادانو او محصلانو په مرسته خپاره شي.
مجلس د (ابن سینا لارویان) مجلې په مخ کتنه او ویش سره پای ته ورسید.
