د روغتيايي ملي سمپوزیم د وړانديزونو د تطبیق د اجرايي کمیتې ناسته دايره شوه
د لوړو زده کړو وزارت دعلمي مرستیال پوهنمل عبدالتواب بالا کرزي تر مشرۍ لاندې د روغتیايي ملي سمپوزیم وړاندیزونو د تطبیق کمیټې ناسته ترسره شوه. په یاده ناسته کې چې یو شمیر اداري او خصوصي بنسټونه پکې غړیتوب لري، د منابعو د همغږۍ په موخه د ناروغ د خوندیتوب، په هېواد کې د روغتیايي او لوړو زده کړو سیستم ځواکمنتیا او د اداراتو د تخنیکي پلانونوچارې او د اړوند ادارې فعالیتونه د طبي شورا تر مدیریت لاندې پر مخ وړي.
د ناستې په پیل کې د لوړو زده کړو علمي مرستيال پوهنمل عبدالتواب بالا کرزي وویل؛ په اوسنیو شرایطو کې د طبي شورا ایجادول د اوسني وضعیت د ښه توب لپاره یو غوره ګام دی چې له نېکه مرغه لوړو زده کړو وزارت د لومړۍ ورځې څخه له دې شورا سره همکار و څو په خپلو پښو ودرېږي.
هغه وویل چې د لوړو زده کړو وزارت د کاري مسوولیتونو په پام کې نیولو سره د اړوندو ادارو لپاره یو ښه همکار دی او هغه موارد؛ چې د عملیاتي پلان او روغتیايي ملي سمپوزیم په اړه د لوړو زده کړو وزارت اړوندېږي د یوې ځانګړې او مسلکي کمیټې له خوا به رسیدنه ورته وشي.
د افغانستان د طبي شورا د ډاکټرانو د چارو د تنظیم سرپرست رئیس ډاکټر احمد شاه شکوهمند په دې اړه د یو پریزینټشن په ترڅ کې عملیاتي پلان او د روغتیايي ملي سمپوزیم وړاندیزونه د کمیټې غړو ته وړاندې کړل، چې پر بنسټ يې د اړوندو ادارو دندې او مسوولیتونه مشخص او تشرېح شول.
همداراز د لوړو زده کړو وزارت د کیفیت د تضمین او اعتبار ورکولو رئیس پوهندوی ډاکټر محمد نعیم عظیمي او د کمیټې یو شمیر غړو د اړوندو ادارو فعالیتونه، وړاندیزونه او طرحې د ناستې له ټولو ګډونوالو سره شریکې کړې.
دناستې په پای کې پرېکړه وشوه، چې اړوندې ادارې خپل عملیاتي پلانونه په عاجله توګه چمتو او د طبي شورا سره دې شریک کړي تر څو له توحید وروسته د جمهوري ریاست د لومړي معاونیت مقام ته وړاندې شي.
