د طبي لوړو زده کړو د کیفیت لوړولو او په کادري روغتونونو کې د ښو خدمتونو وړاندې کولو په موخه غونډه وشوه
د طبي لوړو زده کړو کیفیت لوړولو او په کادري روغتونونو کې د ښو خدمتونو وړاندې کولو په پار د لوړو زده کړو وزارت علمي معین پوهنمل عبدالتواب بالاکرزي په مشرۍ ناسته وشوه، چې د افغانستان طبي شورا، عامې روغتیا او د طبي دولتي او خصوصي لوړو زده کړو بنسټونو استازو هم پکې ګډون درلود.
د لوړو زده کړو وزارت علمي معین پوهنمل عبدالتواب بالاکرزي د طبي لوړو زده کړو بنسټونو ستونزو او محدودیتونو ته په اشارې سره وویل، چې لوړو زده کړو وزارت تل په علمي او اکاډمیک صداقت او د وطندوستۍ په احساس سره د هېواد طبي لوړو زده کړو بنسټونو د کیفیت ښه کولو کې هڅه کړې ده. دغه راز له اړوندو او مسوولو ادارو سره یو ځای یې په کادري روغتونونو کې د ښو خدمتونو وړاندې کولو او په دولتي او خصوصي لوړو زده کړو بنسټونو کې یې په ډېره مینه د کیفیت لپاره کار کړی او دغه پروسه دوام لري.
په دغه ناسته کې د کابل طبي پوهنتون یوه استاد د (د افغانستان لوړو زده کړو په برخه کې لاسته راوړنې، ستونزې او حل لارې) تر سرلیک لاندې پرېزنټېشن وړاندې کړ او وروسته د طبي لوړو زده کړو نظام او کادري روغتونونو د برخې ستونزې په ګوته او د حل لارو وړاندیز ورته وشو.
د طبي لوړو زده کړو او کادري روغتونونو په برخه کې یو شمېر څانګپوهان (متخصصان)، د چڼو وهلو او په دې برخه کې د اکاډمیکو حل لارو موندلو لپاره وګومارل شول چې دغه موضوع له علمي پلوه وڅېړي او د وروستۍ ناستې لپاره یو نظر وړاندې کړي، تر څو د تخصصي لیدلورو راټولولو او تر وروستني بحث وروسته د طبي بنسټونو د کیفیت د ښه والي لپاره د وړاندیزونو یوه ټولګه د ا.ا.ج کابینې ته وړاندې شي.
