د لوړو زده کړو خصوصي بنسټونو د بېلابېلو څانګو د ارزونې میتودونو څرنګوالي او پوهاوي ورکولو ورکشاپ جوړ شو

د لوړو زده کړو خصوصي بنسټونو بېلابېلو څانګو د ارزونې د میتودونو او څرنګوالي په موخه د ځینو دغو بنسټونو علمي مرستیالانو لپاره په کابل پوهنتون کې یو ورځنی ورکشاپ جوړ شو.

په یاد ورکشاپ کې د لوړو زده کړو وزیر دوکتور عباس بصیر د هېواد خصوصي تحصیلي بنسټونه د تحصیلي نظام مهمه برخه وبلل او ویې ویل، چې اوسمهال شاوخوا دوه سوه زره زدکړیالان (نجونې او هلکان) د هېواد د لوړو زده کړو خصوصي بنسټونو کې په زده کړو بوخت دي.

هغه زیاته کړه چې په تحصیلي بنسټونو کې د پخوا په پرتله د کیفیت او کمیت له پلوه د پام وړ بدلونونه لیدل کېږي او په دغه بهیر کې داسې خصوصي تحصیلي بنسټونه هم رامنځته شوي چې په نړیواله درجه بندۍ کې ښه ځای خپل کړی دی. خو د کیفي پرمختګ سره سره په دې برخه کې یو لړ ستونزې شته چې باید هوارې شي.

لوړو زده کړو وزیر د اکاډمیکو چارو د څارنې او ارزونې له ریاست څخه مننه وکړه چې دغه ورکشاپ یې جوړ کړ او دغه ګام یې د لوړو زده کړو خصوصي بنسټونو د قوت او کمزورۍ ټکو، چانسونو او ستونزو په رابرسېره کولو او حل لارو کې ارزښتمن وباله.

دوکتور عباس بصیر د ورکشاپ له ګډونوالو څخه وغوښتل چې د لوړو زده کړو وزارت اکاډمیکو چارو د څارنې او ارزونې ریاست له لوري د ارزونې ترتیب شوي چک لېسټ په هر بند بحث او خبرې وکړي ترڅو له هغې سره سم د ارزونې پروسه په سمه توګه تر سره شي.

ورپسې د لوړو زده کړو وزارت اکاډمیکو چارو د څار او ارزونې رییس پوهندوی دوکتور محمد ولي حنیف وویل:"د لوړو زده کړو خصوصي بنسټونو د ارزونې موخه د اوسني حالت ارزونه، د بنسټونو توپیر او درجه بندي، د قوت او کمزورتیا ټکو او همدارنګه ستونزو په ګوته کول او د دغې ارزونې پر بنسټ د دغو بنسټونو لپاره د مشخصې پالیسۍ جوړول دي."

هغه زیاته کړه، پخوا د خصوصي لوړو زده کړو بنسټونو ۴۵ طبي او ۴۰ د انجنیري څانګې ارزول شوي او په پام کې ده چې د هېواد د کابینې د پرېکړې پر بنسټ تر راتلونکو شپږو میاشتو پورې پاتې څانګې هم وارزول شي.

وروسته د دغه وزارت د خصوصي بنسټونو د زدکړیالانو د چارو رییس پوهندوی دوکتور خیبر سیفي د کیفیت، علمي څېړنو، د محصل محورۍ سیسټم پر پلي کولو او د کار وړ بشري ځواک روزلو په اړه وینا وکړه چې د ټولنې اړتیاوو ته ځواب وویلای شي.

په پام کې ده چې د هېواد تحصیلي بنسټونو ۳۵۹ بېلابېلو پوهنځیو د ارزونې پروسه، د مرکز او ولایتونو په دوو پروژو کې چې ۱۸۶ د مرکز او ۱۷۳ د ولایتونو پوهنځي دي، د وږي میاشتې تر پایه او که چېرې په دغه موده کې بشپړ نه شي نو د تلې میاشتې تر ۱۵مې به پای ته ورسېږي.

په یاد یوه ورځني ورکشاپ کې ګډونوالو د خصوصي لوړو زده کړو موسسو د پروګرامونو د ارزونې کاري پروسيجر، شکایتونو ته رسېدنې څرنګوالي، د ارزونې پروسې ته د لوړو زده کړو خصوصي بنسټونو چمتووالي، د چک لېسټ پلي کولو او په یو شمېر نورو اړوندو برخو بحث وکړ او نطرونه یې سره شریک کړل.