د لوړو زده کړو د داخلي تفتيش رييس، د علي اباد د کادري روغتون د وضعيت ارزونه وکړه
د لوړو زده کړو د داخلي تفتيش رييس تېره شپه په ناڅاپي ډول له علي اباد کادري روغتون ليدنه وکړه او په دې روغتون کې يې د روغتيايي خدمتونو د وړاندې کولو د څرنګوالي ارزونه وکړه.
د لوړو زده کړو د تفتيش رييس غلام داوود شايق په داسې حال کې چې د راپورونو د شننې امر، د اداري او مالي چارو د قوانينو د رعايت د تفتيش امر او د کړنو د تفتيش امر حضور درلود، د روغتيايي خدمتونو له وړاندې کولو د ډاډ، د نوکريوال ډاکټرانو د حضور، د ناروغانو د کوټو د تسخين او نظافت او د روغتون له ځينو نورو برخو يې ليدنه وکړه او له ناروغانو سره يې د روغتون د مسولينو د چلند او د اعاشوي او روغتیايي موادو د وېش په اړه يې خبرې وکړې.
يادې ډلې د خوړو د کيفيت او پخولو، له مينو سره سمه مېوه او د روغتيايي موادو د وېش لکه ماسک او دست کش په اړه د ياد روغتون د ډاکټرانو او نوکريوالو شکايتونه وليکل. د يادې ډلې په وينا بستري ناروغان د ډاکټرانو له چلند او ښې پاملرنې خوښ وو، خو د روغتون ډاکټران او نرسان د بې کيفيته خوړو له پخولو، بې کيفيته مېوې او د روغتيايي وسايلو لکه ماسک او دست کشو د وېش په اړه شک درلود او څرګنده يې کړه چې له پنځو مياشتو راهيسې غوښه او له لسو ورځو راهيسې شيدې له مينو سره سمې نه ورکول کېږي.
د دې ارزونې په بهير کې د روغتون د داخله سرويس د مرکز ګرمي نه چالان والی، بل هغه څه وو چې د لوړو زده کړو وزارت د داخلي تفتيش رييس يې د ژر تر ژر ه فعاليدو غوښتونکی شو.
غلام داوود شايق د علي اباد روغتون له موظفينو او ډاکټرانو څخه چې په دې روغتون کې زيار باسي او خپله دنده په ښه توګه ترسره کوي، ويې منله چې په ټوليزه توګه د روغتون د ډاکټرانو او پرسونل د پاملرنې له کبله د روغتون وضعيت نظر پخوا ته ښه شوی دی خو اوس هم کمښتونه شته دي چې په ګډو هلو ځلو سره له دې ستونزو څخه وتلای شو.
د نوموړي په وينا ټاکل شوې ده چې د دې ارزونې بشپړ راپور د لوړو زده کړو له مقام سره شريک کړل شي څو د کمښتونو د رفع کولو او قانوني کړنو له پاره لازم اقدامات ونيسي.
د علي اباد تدريسي روغتون د هېواد په کچه يو له پخوانيو کادري او معالجوي روغتونونو څخه دی چې د ۱۳۱۰لمريز کال په جوزا مياشت کې يې د بنسټ ډبره د علي اباد غره په لمن کې اېښودل شوې ده او اوس مهال ۲۵۰ بستر، ۱۲ بېلابېلو څانګو، په بېلابېلو برخو کې د تدريس مسوليت، څېړنه او د هېواد په کچه د روغتیايي خدمتونو وړاندې کول په غاړه لري.
