د لوړو زده کړو سرپرست نامزد وزیر د کابل د ابوعلي سینا طبي پوهنتون د استادانو د اتحادیې رئیس سره وکتل
د لوړو زده کړو سرپرست نامزد وزیر د کابل د ابوعلي سینا طبي پوهنتون د استادانو د اتحادیې رئیس او یو شمېرغړو ستونزې واورېدې.
په دې لیدنه کې د کابل د ابوعلي سینا طبی پوهنتون د اتحاديې رئیس پوهاند نجیب الله امرخیل د مجهز لابراتوار،د طبي او روغتیايي وسایلو د کمبود، د ادیتوریم، جمنازیوم، شنې ساحې د نلرلو یادونه وکړه.
پوهاند نجیب الله امرخیل همداراز له نامزد سرپرست وزیر وغوښتل چې د طبي پوهنتون استادان دې د طبي تجربو د زده کړې په خاطر د نړۍ هېوادونو ته ولیږل شي. وروسته د لوړو زده کړو سرپرست وزیر ډاکټر عباس بصیر وویل: "د افغانستان د پوهنتونونود ښه والي لپاره په ځانګړې توګه د طبي څانګو لپاره جدي هلې ځلې کوي." هغه زیاته کړه افغانستان یو تولیدي او کار پیدا کوونکي تحصیلي نظام ته اړتیا لري او د لوړو زده کړو وزارت هڅه کوي چې په پوهنتونونو کې پر ساینسي معلوماتو ولاړه پالیسي طرح او عملي کړي. د لوړو زده کړو وزارت سرپرست وزیر د جدي همکاریو اوپه مسلکي او اداري برخو کې د استادانو د اړتیاوو د پوره کولو د ژمنې په کولو سره له هغوی وغوښتل، چې په دوامداره هلوځلو سره په پوهنتونونو کې د علم او معرفت سرچینې پراخې کړي او د تدریس ترڅنګ د ژوند یوه برخه له محصلانو سره په ګډه د اکاډمیکو څیړنو د بنسټيز کیدو لپاره ځانګړې کړي.
ډاکټر عباس بصیر وویل: د لوړو زده کړو وزارت هڅی کوي څو د دې وزارت کادرونو ته د سیمې او نړۍ په هیوادونو کې د لنډمهاله او اوږده مهاله زده کړو زمینه برابره کړي او د سیمې او نړۍ له پوهنتونونو سره د هیواد د پوهنتونونو لپاره برنامه ریزي ( پروګرام جوړونه) وکړي.
