د لوړو زده کړو سرپرست وزير کندهار ولایت ته د کاري سفر په ترڅ کې د کندهار او اناسټو پوهنتونونو له مسؤلینو سره وکتل.
د لوړو زده کړو سرپرست وزیر شیخ الحدیث مولوي نداء محمد ندیم د یادو پوهنتونونو له مسؤلینو سره په ناسته کې هغوی ته د ژمنتیا ډاډ ورکړ او ویې ویل: «د ا.ا.ا علم ته ژمن دی او یاده ژمنتیا یې نمایشي نه ده؛ نو تاسو هم باید د تل په څېر کیفیت ته پوره توجه وکړئ، ترڅو په ګډه تحصیلي نظام لا با کیفیته کړو.»
د لوړو زده کړو سرپرست وزير همدارنګه وویل، چې د وزارت په کچه مسؤلین تل له تاسو سره همکار دي او ژمنه یې وکړه، چې ټولو ستونزو ته به د حل لارې پیدا کوي.
دغه راز سرپرست وزیر د اناسټو زراعتي فارم څخه د لیدنې پرمهال وویل چې افغانستان زراعتي اقتصاد لري او په دې برخه کې کار ته اړتیا ده، هغه د یاد پوهنتون مسولینو ته په خطاب کې وویل: «د زراعت په برخه کې له محصلانو سره عملي کار ته ډېر پام وکړئ.»
په ورته وخت کې د کندهار او اناسټو پوهنتونونو مسؤلینو د خپلو خبرو پرمهال د لوړو زده کړو سرپرست وزیر په ورتګ خوښي وښوده او په یو شمېر برخو کې یې خپلې ستونزې او غوښتنې ورسره شريکې کړې، چې د سرپرست وزیر له لوري ورته د ستونزو د حل او غوښتنو د پوره کېدو ډاډ ورکړل شو.
