د لوړو زده کړو سرپرست وزیر او ورسره مل پلاوي د پنجشېر لوړو زده کړو مؤسسې د محصلینو په فراغتغونډه کې ګډون وکړ.
د پنجشېر لوړو زده کړو مؤسسې د ۱۹۳ محصلینو په فراغتغونډه کې د لوړو زده کړو سرپرست وزیر شیخ الحدیث مولوي نداء محمد ندیم صاحب، په داسې حال کې چې د دغې مؤسسې مسؤلینو هم حضور درلود وویل چې د ا.ا.ا مشرتابه د علم له لارې د هېواد پرمختګ ته ژمن دی او د افغانستان ټولو اتباعو لپاره یې د وړیا لوړو زده کړو زمینه برابره کړې ده.
دغه راز د لوړو زده کړو سرپرست وزیر فارغو شویو محصلینو ته وویل چې له فراغت وروسته هم زده کړو او څېړنو ته دوام ورکړي او ترې ویې غوښتل چې له هر ډول قومي، ژبني او سمتي تعصب څخه ځان وساتي او د خپل علم او مسلک له لارې هېواد ودان کړي. دغه راز نوموړي د پنجشېر لوړو زده کړو مؤسسې محصلینو ته د معیاري لوړو زده کړو زمینې برابرولو او د دغه تحصیلي بنسټ د ستونزو د حل ډاډ ورکړ.
همدارنګه د لوړو زده کړو سرپرست وزیر شیخ الحدیث مولوي نداء محمد ندیم صاحب د پنجشېر لوړو زده کړو مؤسسې له تدریسي او اداري ودانۍ څخه د لیدنې پر مهال د ودانۍ د نیمه کاره برخو د جوړولو او د یاد تحصیلي بنسټ د تجهیز ژمنه وکړه.
وروسته د پنجشېر لوړو زده کړو مؤسسې مسؤلینو او محصلینو د لوړو زده کړو سرپرست وزیر په ورتګ او د محصلینو په فراغتغونډه کې له ګډون څخه مننه وکړه او د یادې مؤسسې یو شمېر ستونزې او وړاندیزونه یې وروسره شریک کړل.
د یادولو وړ ده چې د لوړو زده کړو سرپرست وزیر د فراغتغونډې په پای کې محصلینو ته د تشویق په پار ډالۍ ورکړې
نېته: جمعه
۱۴۴۴/۴/۱ ه.ق ۱۴۰۱/۹/۴ ه.ش ۲۰۲۲/۱۱/۲۵
د لوړو زده کړو وزارت مطبوعاتي دفتر
