د لوړو زده کړو سرپرست وزیر د افغانستان کرنیزو علومو او ټکنالوژۍ ملي پوهنتون (اناسټو) له مسؤلینو، استادانو او محصلینو سره وکتل او په دغه پوهنتون کې یې یو شمېر پروژې منظورې کړې
د لوړو زده کړو سرپرست وزیر محترم شیخ الحدیث مولوي نداء محمد ندیم کندهار ولایت ته په خپل رسمي سفر کې د افغانستان کرنیزو علومو او ټکنالوژۍ ملي پوهنتون (اناسټو) له مسؤلینو، استادانو او محصلینو سره په جلا جلا ناستو کې وکتل او په دغه پوهنتون کې یې یو شمېر پروژې منظورې کړې.
د لوړو زده کړو سرپرست وزیر د یاد پوهنتون په علمي شورا کې د مسؤلینو ستونزې او غوښتنې واورېدې او د دغه پوهنتون د مسجد شریف پراخوالي، د حیواني کلینیک فعالېدو، د پوهنتون په داخل کې د قطره یي اوبو رسونې سیسټم فعالولو او د تالار د ترمیم پروژه منظورې کړې.
دغه راز نوموړي د علمي شورا له غړو سره په اناسټو پوهنتون کې د نورو تحصیلي نهادونو د استادانو ظرفیت لوړونې او ماسټري برنامو کې یې د شاملېدو لپاره پر زمینه برابرولو خبرې وکړې.
همدارنګه د لوړو زده کړو سرپرست وزیر په جلا جلا ناستو کې د اسلامي ثقافت له استادانو او د محصلینو له استازو سره وکتل، د محصلینو ستونزې او وړاندیزونه یې واورېدل، د ستونزو د حل ډاډ یې ورکړ او استادانو ته یې سپارښتنه وکړه چې په سالمه اسلامي عقیده د محصلینو په روزنه کې نه ستړي کېدونکې هلې ځلې وکړي.
نېټه: چهارشنبه
۱۴۴۶ هـ ق، د جمادی الاول ۱۸مه
۱۴۰۳ هـ ش د عقرب ۳۰ مه
۲۰۲۴م د نوامبر ۲۰مه
