د لوړو زده کړو سرپرست وزیر د خصوصي تحصیلي بنسټونو له یو شمېر مسؤلینو سره د لیدنې پر مهال د دوی د ستونزو د حل او چارو ښه والي په اړه خبرې وکړې.
په دې لیدنه کې د لوړو زده کړو سرپرست وزیر شیخ الحدیث مولوي ندا محمد ندیم صاحب د لوړو زده کړو وزارت د حکمونو له تطبیق څخه د خوښۍ په څرګندولو سره وویل، چې د لوړو زده کړو وزارت او په ټوله کې د ا.ا.ا د تحصیلي نظام او د هېواد د ځوانانو د زده کړو مخالف نه دی، بلکې د دیني لارښوونو او د هېواد د ملي ارزښتونو په رڼا کې د هغې په ښه والي او پرمختګ باور لري.
د لوړو زده کړو سرپرست وزیر د تحصیلي بنسټونو وروستي حکم ته په اشارې سره وویل: « په حکم کې د نجونو د زده کړو پر وړاندې هیڅ ډول مخالفت نه دی شوی.» نوموړي همداراز د خصوصي تحصیلي بنسټونو له مسؤلینو وغوښتل، چې د ا.ا.ا د رهبرۍ د احکامو او د لوړو زده کړو وزارت د تقنیني اسنادو له مخې باید ځانونه چمتو کړي.
په دې لیندنه کې همداراز د لوړو زده کړو سرپرست وزیر د خصوصي تحصیلي بنسټونو د ستونزو د اساسي حل په موخه د يادو تحصيلي بنسټونو د استازو او د لوړو زده کړو وزارت ترمنځ د يو ګډ کمېسيون د جوړولو لارښوونه وکړه، څو د خصوصي لوړو زده کړو د سکتور د ستونزو د حل او پياوړتيا په برخه کې کار وکړي.
ورپسې د خصوصي تحصیلي بنسټونو په استازیتوب؛ ډاکټر طارق کمال او پوهاند ګل رحمن قاضي د خپلو خبرو په ترڅ کې د لوړو زده کړو وزارت د فرمانونو او په خصوصي تحصیلي بنسټونو کې د لوړو زده کړو وزارت د تقنيني اسنادو د پلي کېدو د ډاډ ترڅنګ خپلې يو لړ غوښتنې او ستونزې شريکې کړې، چې د لوړو زده کړو سرپرست وزیر له لورې د همکارۍ ډاډ ورکړل شو.
نېټه: ۳۰/۵/۱۴۴۴ هـ ق ۳/۱۰/۱۴۰۱ هـ ش ۲۴/۱۲/۲۰۲۲
