د لوړو زده کړو سرپرست وزیر د دیني جامعاتو او تخصصاتو لپاره له ګمارل کېدونکو استادانو د عملي ازموینې بهیر له نږدې وڅاره.
۱۴۴۳/۱۰/۲۸
۱۴۰۱/۳/۸
د لوړو زده کړو سرپرست وزیر د دیني جامعاتو او تخصصاتو لپاره له ګمارل کېدونکو استادانو د عملي ازموینې بهیر له نږدې وڅاره.
دغه ازموینه چې د لوړو زده کړو وزارت د غونډو په تالار کې برابره او د قرانکریم په مبارکو ایاتونو سره پیل شوه، له یو شمیر هغو استادانو څخه چې تحریري او تقریري ازموینې یې وړاندې ترسره شوې وې، عملي تدریس (ډېمو) واخېستل شوه.
د یادې ازموینې د پیل پرمهال د لوړو زده کړو وزارت د تحصیلي نصاب رئیس عبدالرؤف فراهي د ازموینې اجنډا تشریح او معلومات وړاندې کړل.
نوموړي زیاته کړه، استادانو ته به د هیئت منصفه له لوري، د استاد د تدریس طریقې ته په کتلو، پر موضوع د حاکمیت او ورته نورو مهمو خبرو ته په پام سره، نومرې ورکول کېږي او بریالي کسان به د استادانو په توګه وګمارل شي.
همدارنګه راغلو استادانو په خپل وار سره په یوه - یوه موضوع خپله ډېمو وړاندې کړه.
دغه راز د لوړو زده کړو سرپرست وزیر الحاج مولوي عبدالباقي حق اني د ازموینې بهیر له نیږدې وڅاره او د دوی له ډلې ټاکل کېدونکي استادان یې خپلو راتلوونکو مسؤلیتونو ته متوجه کړل او ترې یې وغوښتل، چې محصلین باید د اوسني وخت تقاضاء سره سم په دیني او عصري زده کړو وروزي.
