د لوړو زده کړو سرپرست وزیر د عمریه او قاسمیه مدرسو د لویې دورې او حافظانو د دستاربندۍ په مراسمو کې ګډون وکړ.
د لوړو زده کړو سرپرست وزیر شیخ الحدیث مولوي نداء محمد ندیم صاحب په یادو مراسمو کې د طلباء کرامو او حافظانو په فراغت خوښي وښوده او د دوی پر مکلفیتونو او مسوولیتونو یې خبرې وکړې او و يې ویل: « په اوس عصر کې د علماوو تر ټولو مهمه دنده د دین اظهار دی؛ ترڅو دین تر ټولو ورسوي او دا دنده له پیغمبرانو ورته په میراث پاتې ده.»
همداراز د دیني علومو پر ارزښت وغږېد او زیاته یې کړه چې خلکو ته د خدمتونو وړاندې کولو لپاره پوهه او علم اړین دی؛ ترڅو د هغه په رڼا کې خپلې کړنې ترسره کړي.
دغه راز یې د احیاء اسلام پر موضوع رڼا واچوله او وروسته له فتحې يې د علماوو له سترو مکلفیتونو یو یاد کړ و يې ویل چې په ټولنې کې د اسلامي شعایرو راژوندي کول، د جهادي روحیې ساتل، د دین حاکمیت او نور اسلامي احکامو تطبیق د اسلام احیا ده.
وروسته د قاسمیه مدرسې د فراغت په غونډې کې د کانونو او پټرولیم وزارت سرپرست مولوي شهاب الدین دلاور یاد شوي فارغین د لا زیاتو علومو او پوهې زده کړې ته وهڅول او د مدرسې له مسوولینو یې وغوښتل چې د مدرسې د طلباء کرامو ظرفیت لوړونې او زده کړې ته ځانګړې پاملرنه وکړي.
په پای کې فارغو شویو طلباء کرامو او حافظانو ته د دستارفضیلت پګړۍ ور په سر شوې.
د يادونې وړ ده، چې د لوړو زده کړو سرپرست وزیر د مدارسو د فاضلانو سره څه تعداد نغدي مرسته هم وکړه.
نېټه: چهارشنبه
۱۳/۶/۱۴۴۵هـ.ق ۶/۱۰/۱۴۰۲هـ.ش ۲۷/۱۲/۲۰۲۳م
