د لوړو زده کړو سرپرست وزیر زابل ولایت ته د یوه رسمي سفر په ترڅ کې په میرویس خان نیکه زابل لوړو زده کړو مؤسسه کې یوې سترې غونډې ته وینا وکړه
په دغه غونډه کې د زابل ولایت والي، مرستيال والي، د علماوو شورا ریس د یاد ولایت د جهادي مدرسې مهتمم، د امر بالمعروف او نهي عن المنکر ریس او د یاد تحصیلی نهاد مسؤولینو سربېره ګڼ شمېر استادانو او محصلینو ګډون کړی و.
د لوړو زده کړو سرپرست وزیر محترم شیخ الحدیث مولوي نداء محمد ندیم د محصل پر ارزښت او مقام، د اسلامي نظام او ټولنې پر وړاندې د محصل مسؤلیتونو، د علم او تحصیل پر ارزښت او اهمیت او د دیني او عصري علومو پر ارزښت خبرې وکړې، هغه ټولو ګډونوالو، په ځانګړي ډول محصلینو ته په خطاب کې وویل چې په خپل ورځني ژوند کې اسلامي شریعت تطبیق کړي، څو په دنیا او آخرت کې نجات او کاميابي تر لاسه کړي.
هغه همدا راز د امیرالمؤمنین حفظه الله تعالی د فرامینو په اطاعت ټینګار وکړ او ویې ویل چې د ا.ا.ا مشرتابه د لوړو زده کړو په برخه کې ټولې اړینې اسانتیاوې او امکانات برابر کړي او د تحصیلي بنسټونو په پیاوړتیا کې یې ټول وړاندیزونه منظور کړي دي.
د یادونې وړ ده چې په دغه غونډه کې محترم مرستیال والي صاحب د جهادي مدرسې مهتمم او د علماوو شورا ریس صاحب مهمې ویناوې وړاندې کړې.
نېټه: سه شنبه
۱۷ جمادی الااول ۱۴۴۶ هــ.ق
۲۹ عقرب ۱۴۰۳ هــ.ش
۱۹ نومبر ۲۰۲۴مه
