د لوړو زده کړو سرپرست وزیر شیخ الحدیث مولوي نداء محمد ندیم صاحب په خپل کاري دفتر کې د عامې روغتیا له سرپرست وزیر سره وکتل.
د لوړو زده کړو سرپرست وزیر د عامې روغتیا سرپرست وزیر او ورسره تخنیکي ټیم ته د ښه راغلاست تر څنګ، د دواړو وزارتونو تر منځ پر ګډ کار او همکاریو ټینګار وکړ او د عامې روغتیا له سرپرست وزیر څخه یې وغوښتل چې د دغه وزارت د تدریسي روغتونونو د ځینو خرابو وسایلو د ترمیم، په ځينو ولایتونو کې د تدریسي روغتونو لپاره د زېربنا، اکمال تخصص پروګرام او د ډونرانو د پیداکولو په برخه کې مرسته وکړي.
همدارنګه د عامې روغتیا سرپرست وزیر ډاکټر قلندر عباد وویل چې د دواړو وزارتونو کارونه له یوبل سره تړلي او زیاته یې کړه چې لوړو زده کړو وزارت د عامې روغتیا لپاره بشري ځواک روزي. نوموړي د تدریسي روغتونونو د پرمختګ او ستونزو د حل په برخه کې د همکارۍ ژمنه وکړه او پر ګډ کار یې ټینګار وکړ.
د یادونې وړ ده چې د دواړو اړخونو له لوري یوه ګډه تخنیکي کمېټه وټاکله شوه، تر څو د ستونزو پر حل او ګډو همکاريو کار وکړي.
نېټه: پنجشنبه
