د لوړو زده کړو سرپرست وزیر په خپل کاري دفتر کې د ایران له سفیر سره پر دوه اړخیزو علمي همکاریو خبرې وکړې.
۱۴۴۴/۱/۲۲
۱۴۰۱/۵/۲۹
د لوړو زده کړو سرپرست وزیر الحاج مولوي عبدالباقي حقاني، په داسې حال کې چې د لوړو زده کړو وزارت مالي او اداري معین، د بهرنیو اړیکو او بورسونو د تنظیم رئیس او د کابل پوهنتون رئیس هم حضور درلود، د ایران سفیر ته د ښه راغلاست تر څنګ، د ایران او فغانستان ګډې همکارۍ د دواړو هېوادونو او سیمې په ګټه وبللې. نوموړي د ایران او فغانستان تاریخي ښو اړیکو ته په اشارې سره وویل: «افغانستان او ایران ګډ دیني او کلتوري ارزښتونه لري او دواړه هېوادونه له یو ډول بندیزونو سره مخ دي، چې له یوبل سره همکاري یې اړینه ده.»
الحاج مولوي عبدالباقي حقاني د افغانستان او ایران تر منځ پر ګډو علمي او اکاډمیکو همکاریو د ټينګار تر څنګ، په علمي برخه کې د ایران تجربې د افغانستان لپاره مهمې وبللې او د ایران له سفیر څخه یې وغوښتل چې په تحصیلي برخه کې له افغانستان سره مرسته وکړي.
همدارنګه د ایران سفیر بهادر امینیان وویل، چې ایران او افغانستان ځوان بشري ځواک او سرشاره طبعي سرچینې لري او افغانستان هم له بندیزونو سره سره د ایران په شان پر ځان بسیا کېدای شي.
نوموړي د لوړو زده کړو وزارت یوه تخنیکي ټيم ته بلنه ورکړه چې ایران ته ولاړ شي او د دغه هېواد د لوړو زده کړو سیسټم له نیږدې وګوري او له تجروبو یې ګټه واخلي. دغه راز د ایران سفیر افغان محصلینو او استادانو ته د بورسونو ورکو په برخه کې هم تیاری وښود.
