د لوړو زده کړو سرپرست وزیر په خپل کاري دفتر کې د سره صلیب او اسلامي بانک له استازو سره ناسته ترسره کړه

سه شنبه، ۲۴ کب ۱۴۰۰
د لوړو زده کړو سرپرست وزیر په خپل کاري دفتر کې  د سره صلیب او اسلامي بانک له استازو سره ناسته ترسره کړه.
یاده  ناسته چې د لوړو زده کړو وزارت په مقام کې د سرپرست وزیر مولوي عبدالباقي حقاني په مشرۍ ترسره شوه، په کې د لوړو زده کړو وزارت د بهرنیو اړېکو او بورسونو تنظیم رئیس نظرمحمد عرفان، د علي آباد تدریسي روغتون رئیس ډاکتر عماد الدین ځاځي، د افغانستان لپاره د سره صلیب نړیوالې کميټې ځانګړي استازي ریټو شټاکر او د اسلامي بانک استازي عطاء الرحمن دراني ګډون کړی وو.
په دې ناسته کې د لوړو زده کړو سرپرست وزیر مولوي عبدالباقي حقاني د یادو استازو له راتګ مننه وکړه او د دوی تېر او وروستي فعالیتونه یې وستایل.
ښاغلي حقاني دغه راز وویل: " داچې سره صلیب تل او په هر وخت کې د ا،ا،ا سره پوره همکاري کړې؛ نو اوس هم ترې هېله لرو چې په بېلابېلو برخو کې همکاري وکړي."
دغه راز یې د هېواد د ابادۍ لپاره د لوړو زده کړو وزارت تر چتر لاندې تدریسي روغتونونه مهم وبلل او له یادو روغتونونو سره یې د دوی د همکارۍ غوښتنې ترڅنګ د کومکونو په شفاف ډول مصرفولو ډاډ ورکړ.
نوموړي زیاته کړه، مرستندویه ادارې باید د تدریسي روغتونونو د استادانو ظرفیت لوړونې، د دغو روغتونونو خود کفاء کولو او ورته نورو برخو کې همکاري وکړي، ترڅو خپلو هېوادوالو ته لا ښه خدمتونه ترسره وکړو او ناروغان مو ګاونډیو هېوادونو ته له تګ راوګرځول شي.

همدا شان یې د اسلامي بانک له استازي  وغوښتل، چې د لوړو زده کړو وزارت سره په پراختیايي او پرمختايي برخو کې همکاري وکړي، چې د یادو استازو له لوري د لوړو زده کړو سرپرست وزیر ته د هر ډول همکارۍ ډاډ ورکړل شو.
د افغانستان لپاره د سره صلیب نړیوالې کميټې ځانګړي استازي ریټو شټاکر په خپلو خبرو کې وویل، موږ افغانستان سره په سختو شرایطو کې مرسته وکړه او اوس هم هر ډول مرستې ته تیار یوو، موږ هڅه کوو چې د لوړو زده کړو وزارت تر چتر لاندې تدریسي روغتونونو د استادانو ظرفیت لوړونې او ورته نورو برخو کې همکاري وکړو.